Durante e último reunion di toma di desishon
den Konseho Insular di Boneiru, e lider di Frakshon M21,
Daisy Coffie, a presentá e moshon di Mesa di Klima. E
propósito di e moshon tabata pa aselerá formashon di e
Mesa di Klima i sigurá e fondonan nesesario. E moshon a
keda unánimemente aseptá pa Konseho Insular. Siman
pasá, Kolegio Ehekutivo a apuntá gezaghèber interino,
Reynold ‘Nolly’ Oleana, komo presidente independiente di
Mesa di Klima.
Promé ku final di òktober 2024, Mesa di Klima mester entregá
un plan di klima, ku mester enfoká riba medidanan relashoná
ku adaptashon i mitigashon di kambio di klima pa Boneiru. Sr.
Oleana, komo presidente di Mesa di Klima, lo risibí sosten di
un sekretariado. Tambe Konseho Insular a pidi den e moshon
pa Kolegio Ehekutivo atkerí un ofisina di proyekto ku tin e
ekspertisio i kapasidat nesesario pa sostené e presidente i e
sekretariado di Mesa di Klima.
Frakshon M21 a tuma nota di e veredikto di djamars último, den e kaso di Korte Oropeo di
Derechonan Humano na Straatsburg. Segun prensa hulandes, un grupo di aktivista suiso,
e asina yamá ‘welanan di klima’, huntu ku seis hóben portugues i un alkalde franses a
entamá tres kaso pa violashon di nan derechonan humano, pa motibu ku e gobièrnunan
oropeo no a tuma sufisiente medida pa kontrarestá e konsekuensianan di kambio di klima.
Segun prensa hulandes, ekspertonan legal ta antisipá ku e viktoria di e aktivistanan lo tin
konsekuensia pa Hulanda tambe, unda Korte Supremo Oropeo lo por eksigí ku
gobièrnunan oropeo mester implementá un polítika mas estrikto pa garantisá nos derecho
humano pa tin un klima saludabel.
Mirando ku na yanüari 2024, ocho boneriano, huntu ku Greenpeace, a entamá un kaso
legal kontra gobièrnu hulandes pa hustisia di klima, Frakshon M21 ta vigilá e desaroyonan
aki djaserka. Aki tambe nan ta eksigí pa gobièrnu hulandes protehá Boneiru kontra e
konsekuensianan di kambio di klima i hasi mas pa limitá e kambio klimatológiko bou di 1,5
grado.
Boneiru ke kontribuí na frenamentu di Kambio di Klima
Segun e rapòrt di kwartiermaker Ed Nijpels, Kolegio Ehekutivo ke kontribuí na e metanan
klimatológiko hulandes i ta mira sosten polítiko, atministrativo i sosial na Boneiru pa
promové sostenibilidat. Nijpels a konstatá sí ku tin un nesesidat di konosementu,
ekspertisio, direkshon i kordinashon riba tereno di mitigashon i adaptashon di klima.
Miéntras ku pa Hulanda Europeo e Programa Delta i e Strategia Nashonal di Adaptashon
di Klima ta na vigor, nan no ta aplikabel na Hulanda Karibense. Mientrastantu, Boneiru ta
trahando riba implementashon di e plan di medio ambiente i naturalesa di Hulanda
Page 2 of 2
Karibense (NMBP). NMBP, e programa di desaroyo teritorial, i e plan di desaroyo teritorial
ta programanan eksistente ku ta instrumental den e tarea di adaptashon di klima na
Boneiru. Adishonalmente, Kolegio Ehekutivo di Boneiru a pidi Waterschap Rijn en IJssel
pa duna konseho tokante maneho di awa.
Awor ku a instalá Sr. Oleana komo presidente di e Mesa di Klima na Boneiru, a urgi
Kolegio Ehekutivo pa kuminsá lo mas pronto posibel ku un kampaña informativo tokante
kambio di klima pa e habitantenan di nos isla. Tambe a pidi Kolegio Ehekutivo pa hasi e
fondonan di Reino disponibel pa entidat públiko Boneiru, pa realisá tantu establesimentu
di e Mesa di Klima, desaroyo di e Plan di Klima, komo implementashon di e kampaña
informativo.