Konseho Sosial Ekonómiko (SER) a emití un konseho na Minister di Finansa sr. mr. drs. Javier Silvania riba djárason 13 di mart último, tokante un konsepto di un dekreto gubernamental pa revisá e Ordenansa Nashonal di Fasilidatnan Fiskal pa Invershonnan (LBI). E inisiativa aki, impulsá pa e minister, i motivá pa e nesesidat di diversifikashon ekonómiko i stimulashon di invershon, ta proponé pa inkluí e sektor di weg’i plaka online den e kuadro di insentivo fiskal di LBI.
E konsepto di e dekreto gubernamental ta resaltá e potensial di ““weg’i plaka” online” pa kontribuí na kresementu ekonómiko di Kòrsou i bienestar general, den konkordansia ku dokumentonan di maneho nashonal stratégiko. E paso aki por, no solamente atraé invershonnan nobo, sino tambe fortifiká e sektor ekonómiko eksistente i influensia positivamente e dinámika sosioekonómiko di e isla.
Resientemente, SER, e órgano tripartit di konsulta, ku ta konsehá tantu gobièrnu komo Parlamento di Kòrsou, a hasi vários rekomendashon importante tokante lei i regulashon proponé pa e sektor di weg’i plaka online.