Aksidente entre dos vehíkulo
Djabièrnè 13 di yüni, alrededor di 7.15 or di mainta, ‘meldkamer’ sentral a risibí notifikashon tokante un aksidente entre dos vehíkulo na Kaya Breda. Na yegada di polis, tur okupante tabata pafó di e vehíkulonan. Debí ku tabatin dos menor di edat tambe den un di e vehíkulonan enbolbí, personal di ambulans a hasi un chekeo médiko ku nan. No mester a transportá niun di esnan enbolbí pa hòspital. A hasi un tèst di supla ku ámbos shofùr, ku resultado negativo.
Entradanan hudisial ku detenshon
Den e dianan ku a pasa a tene vários detenshon i entrada hudisial en konekshon ku e investigashon di e kaso di tiroteo di djadumingu último. E Grupo di Tarea Spesial (Groep Bijzondere Opdrachten, GBO), a ehekutá e detenshonnan.
Den oranan trempan di anochi di djaweps 12 di yüni, a detené un hòmber di inisial J.S.W. di 23 aña di edat pa violashon di Lei di Arma di Kandela BES. E detenshon a tuma lugá na Kaya Karpitan. Despues di e detenshon, a tene un entrada hudisial na un kas na e mesun adrès. A konfiská algun artíkulo relevante pa e kaso.
Djamars 10 di yüni, den oranan di mèrdia, dos detenshon a tuma lugá den bario Santa Barbara en konekshon ku e investigashon di e kaso di tiroteo di djadumingu último. A detené dos hòmber, un di inisial C.C.C.D. di 18 aña di edat i A.C.W. di 27 aña di edat pa violashon di Lei di Arma di Kandela BES. Riba e mesun dia a tene dos entrada hudisial. E promé na un kas situá na Kaya Berilo i e di dos na un kas situá na Kaya Konfo. A konfiská algun artikulo relevante pa e kaso.
Investigashon den e kaso ta kontinuá.
Ladronisia di baiskel
Djaweps 12 di yüni a drenta keho di ladronisia di un baiskel koló blanku/oraño/bèrdè di e marka Batavus. E baiskel tabata den balkon di un kas na Kaya Nikiboko Nort i deskonosínan a bai kuné.
Djasabra 7 di yüni a drenta keho di ladronisia di un baiskel koló blou di e marka Red-Line. Deskonosínan a drenta un kurá na Kaya Sorsaka i a bai ku e baiskel.
Ta investigando e kasonan.
Ladronisia for di vehíkulo
Djárason 11 di yüni a drenta keho di ladronisia for di un pikòp di hür na Altamira Unjo den Rincon. Mientras e okupantenan tabata saka potrèt, deskonosínan a kue sèn kèsh for di un tas ku nan a laga den e vehíkulo.
Djamars 10 di yüni a drenta keho di ladronisia for di un outo stashoná na Kaya Hermes. Deskonosínan a fòrsa un bentana di outo i a bai ku pertenensianan personal.
Djamars 10 di yüni a drenta keho di ladronisia for di un outo stashoná riba tereno di un kas na Kaya Hermes. E outo tabata será, pero deskonosínan a fòrsa un porta di e outo i a bai ku un tas ku den dje un pòtmòni ku kontenido.
Ta investigando e kasonan.
Kiebro den kas
Djárason 11 di yüni a drenta keho di kiebro na un kas na Kaya Patachi. Deskonosínan a haña akseso na e kas i a bai ku vários hèrmènt. Ta investigando e kaso.
Aksidente Kaya Piedra Presioso
Djamars 10 di yüni, alrededor di 12.15 or di mèrdia, ‘meldkamer’ sentral a risibí notifikashon tokante un aksidente entre dos vehíkulo riba Kaya Piedra Presioso. Debí ku kaya tabata slep dor di yobida, e vehíkulo a slep i dal den e otro vehíkulo. A dirigí brantwer tambe na e sitio debí ku un shofùr a keda pegá. Na momentu ku a saka e vehíkulo for di e outo, ambulans a hib’é hòspital pa tratamentu médiko.
Bo a mira algu sospechoso? Yama 717 8000 òf e liña di tep anónimo 9310.
