Kaso di bringamentu ku herido
Djaweps 28 di ougùstùs, alrededor di 10.20 or di anochi, ‘meldkamer’ sentral a risibí notifikashon tokante un bringamentu na un establesimentu di hóreka na Bulevar Miguel A. Pourier, di kua un persona a resultá heridá. Na yegada di polis i ambulans a resultá ku durante e bringamentu, e víktima a risibí kòrtá ku un opheto deskonosí. E kontra partido no tabatei mas na e sitio. E víktima a risibí tratamentu médiko na e sitio, pero e no tabata deseá di bai hòspital pa tratamentu médiko mas avansá. Ta investigando e kaso.
Aksidente entre dos outo
Djaweps 28 di ougùstùs, alrededor di 2.10 or di atardi, un aksidente entre dos outo a tuma lugá na e krusada di Kaya Avelino J. (Abechi) Cecilia, Kaya Andres A. Emerenciana i Kaya Raspa. Ambulans a transportá ámbos shofùr pa hòspital pa tratamentu médiko. A resultá ku un di e shofùrnan no a duna preferensia na e krusada, di kua a okashoná e aksidente. Debí na prioridat di kuido médiko, no por a hasi un tèst di supla ku e shofùrnan.
Insidente na trabou
Djaweps 28 di ougùstùs, alrededor di 10.45 or di mainta, ‘meldkamer’ sentral a risibí notifikashon tokante un insidente riba trabou na un edifisio na Sabadeco Terrace. E víktima a kai for di haltura ora e tabata ehersé trabou i ambulans a transport’é pa hòspital pa tratamentu médiko.
Detenshon pa intento di ladronisia i destrukshon
Djaweps 28 di ougùstùs, alrededor di 1.35 or di mardugá, a detené un hòmber di inisial J.S.L. di 27 aña di edat na Kaya Carlos A. Nicolaas pa intento di ladronisia i destrukshon. A gara e sospechoso durante un intento di kiebro pero despues el a logra hui. Despues a rekonosé riba kámara di seguridat i seguidamente a detené. Investigashon den e kaso ta kontinuá.
Ladronisia di skuter
Djaweps 28 di ougùstùs a drenta keho di ladronisia di un skuter koló pretu i blou skur di e marka Kymco, modèl Agility, sin plachi di number. E skuter tabata stashoná den kurá di un kas na Kaya Shoshori. Ta investigando e kaso.
Aksidente
Djárason 27 di ougùstùs, alrededor di 11 or di mainta, un aksidente entre dos outo a tuma lugá riba Kaya Neerlandia. Un di e outonan a bèk for di un sitio di stashoná i subi kaya despues di kua un otro outo a bin dal den dje. Personal di ambulans a duna un di e shofùrnan tratamentu médiko. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo.
Bo a mira algu sospechoso? Yama 717 8000 òf e liña di tep anónimo 9310.