Ladronisia for di vehíkulo
Djaweps 3 di aprel a drenta keho di ladronisia for di un outo di hür. Debí ku e outo tabata stashoná na diferente sitio na e parti nost di e isla, no ta konosí ainda na unda e ladronisia a tuma lugá. Deskonosínan a bai ku un ‘drone’ (DJI Mini 4 Pro inkluso asesorionan) i sèn kèsh for di e outo. E outo no tabata na lòk. Ta investigando e kaso.
Ladronisia for di kas
Djaweps 3 di aprel a drenta keho di ladronisia den un kas na Kaya Serafina. Deskonosínan a bai ku un tas di skouder ku entre otro un lèptòp di e marka Lenovo, ‘airpods’, een telefòn di e marka Samsung A14, un ‘notebook’, un mididó di temperatura di awa i un kargadó di telefòn Iphone, for di e kas.
Djamars 1 di aprel a drenta keho di kiebro den un kas situá na Kaya Dialma. Deskonosínan a bai ku entre otro un ‘headphone’ di e marka JBL, sèn kèsh, kèds di e marka Nike tipo Air Force, un JBL box i un lèptòp di e marka Acer.
Detenshon pa manehá bou di influensia
Djárason 2 di aprel, alrededor di 4.45 or di mardugá, a detené un hòmber di inisial C.A.A.V. di 38 aña di edat na Kaya Macario (Cai) Sint Jago pa manehá bou di influensia di alkohòl. E sospechoso tabata enbolbí den un aksidente riba e kaya menshoná na unda kua el a dal den un vehíkulo stashoná. A hasi un tèst di supla kuné. For di esaki a resultá ku e sospechoso a konsumí mas alkohòl ku ta permití na momentu ku bo ta manehá un vehíkulo.
A bai kuné warda di polis pa un análisis di rosea. Despues di mas investigashon a resultá ku e sospechoso no por a mustra un reibeweis. Esaki ta e di dos biaha ku e sospechoso ta okashoná aksidente bou di influensia di alkohòl i ku e ta manehá sin reibeweis.
Ladronisia di baiskel
Djamars 1 di aprel a drenta keho di ladronisia di un baiskel (fatbike) di hür, di e marka Biker’s Choice. E baiskel tabata stashoná na un kompleho di apartamentu na Kaya Sabana i deskonosínan a bai kuné. Ta investigando e kaso.
Kòntròl den Centrumgebied
Djamars 1 di aprel, a parti diferente but pa stashoná robes den Centrumgebied. A konstatá diferente vehíkulo stashoná riba asera òf na sitionan ku ta prohibí pa stashoná vehíkulo. Durante e kòntròl aki a duna sinku (5) but i a tou dos (2) vehíkulo bai kuné.
Polis ta atvertí ku lo tou vehíkulonan mal stashoná den e área di ‘centrumgebied’ i besindario na sitionan ku no ta permití. Personanan ku kometé violashon por haña un but di te ku $85, i por tou e vehíkulo mal stashoná. Gastunan di tou ta bini riba kuenta di e doño di e vehíkulo. Tuma bo responsabilidat komo usuario di karetera i kontribuí na un tráfiko sigur.