Despues di insistencia continuo, fraccion di PPA a haya finalmente contesta for di minister Dowers tocante e incidente tragico di e hoben Ayden Lanooy, cu a perde su bida na a penas 19 aña despues di ricibi 20 bala inexplicabel. “Esaki sigur no ta un caso cu nos por laga muri den silencio. Ya cinco luna a pasa y casi 1 luna y mey pa 2 luna, cu tur investigacion a bin bek di Hulanda, segun Ministerio Publico mes a indica. Pero tin mas punto di atencion cu ta urgente den Cuerpo Policial y PPA a haci apelacion na minister pa atende cu esakinan” segun parlamentario Otmar Oduber.
Ministerio Publico mester sali for di e silencio profundo
Segun informacionn cu nos como fraccion a ricibi, tur e material di investigacion ya a regresa for di Hulanda. Sinembargo, ni famia, ni comunidad, ni Parlamento no a haya actualisacion oficial di e siguiente pasonan. “Kico ta e siguiente paso cu Ministerio Publico ta bay tuma? Cuanto investigacion mas? Kico y ken ta responsabel y kico ta bay haci? Cuanto mas nos tin cu warda? Famia, Parlamento y pueblo di Aruba mester por haya sa kico ta pasa,” Oduber a insisti
Seguridad y bienestar mental y fisico di e polisnan
PPA ta hopi preocupa cu e e circumstancianan di nos cuerpo policial. E stress y e falta di sosten mental y fisico sigur ta alarmante. “Den nos preguntanan nos a puntra specificamente tocante integracion di psicologonan den e organisacion di polis. Sinembargo a indica cu na momento cu e polis tin mester di e sosten of guia aki, e ta algo externo, pues e no ta formalmente integra den cuerpo policial,” Oduber a lamenta. Fraccion di PPA ta gradici cu minister Dowers a compromete su mes cu un reorganisacion cu lo atende cu e temanan di salud mental y fisico, como tambe training extra di uzo di arma. Esaki ta di sumo importancia pa e agentenan tin formacion continuo riba uzo apropia di arma y maneho di e situacionnan critico.
Overtime y su consecuencianan
E situacion ta ainda mas serio, ora cu nos a compronde cu e mayoria di nos polisnan ta traha exceso di overtime sin espacio pa recreacion of deporte. “E ambiente cu nos polisnan ta traha aden no ta sostenibel. Si nos no cuida nan bienestar mental y fisico, nos mes ta pone seguridad publico den peliger,” segun Otmar.
PPA ta satisfecho cu e minister a contesta finalmente y tambe confirma cu un gran cantidad di punto cu PPA a presenta lo haya atencion. Minister den su contestanan mes a indica riba e punto di uzo di arma di nos cuerpo policial, cu e lo percura pa tin mas trainingnan y pa nan ta mihor prepara y cu no ta bay laga e parti aki solamente ora nan ta bay e opleiding y despues nunca mas ta haya oportunidad pa traha cu esaki. Pues PPA ta contento cu e minister ta compromete su mes cu e punto aki presenta pa PPA pa mehora esaki. Den e contestanan ricibi, PPA por a tuma nota di hopi contenido cu ta relevante y interesante. “Mi ta gradici e minister tambe p’e tabata habri y minister ta sostene fraccion PPA pa loke ta trata e drug test p’e agentenan policial. Mi a lesa e comentarionan di minister, cu reorganisacion ta na caminda y esey sigur ta necesario,” Otmar a finalisa bisando.
