Miembro di partido Raiz, Kinsasha Thielman–van der Bliek, ta papia di un tema importante y sumamente relevante: soberania alimenticio. Thielman-van der Bliek ta splica cu alimentacion ta bay hopi mas leu cu djis sa kico mester cumpra na supermercado. E ta importante pa pueblo sa con pa cultiva locual nos ta come den nos propio tera y con pa cria bestia chikito pa por pone algo di come riba mesa. Pesey e ta expresa su preocupacion pa e proyecto cu Minister Geoffrey Wever di Agricultura, kier introduci cu no ta sostene ni stimula desaroyo y cultivo local.
Sra. Thielman-van der Bliek ta splica cu como isla cu ta depende riba importacion di 90% di alimento, Aruba ta hopi vulnerabel pa desaroyonan internacional. Si mira tur locual cu ta pasando mundialmente, entre otro, diferente conflicto na nivel internacional, e situacion ta alarmante.
Na Aruba tin diferente persona cu conocemento di con pa cultiva den nos condicion di clima y den tera cu hopi ta bista ta parce desierto. Sra. Thielman-van der Bliek mes a desaroya un interes pa algun tempo caba pa educa su mes riba e tradicion aki. El a splica cu su enfoke ta pa yuda famianan of comunidadnan chikito, pa nan por compronde e importancia di sikiera cultiva algo den nan espacio, hasta si tin solamente un espacio chikito. Pasobra e ta hopi importante pa nos sobrevivencia, pa un persona mes por pone algo di come riba su mesa.
Durante e pandemia hopi hende a realisa con dependiente Aruba tabata riba alimentacion di cierto region. Aunke tabata pa un periodo cortico, Aruba a experiencia con e situacion ta bira ora e proceso di transportacion di alimentacion tranca. E desaroyonan mundial actual tambe ta uno hopi alarmante pues, no por ignora e situacion aki y e impacto negativo a consecuencia di e dependencia cu tin riba importacion di alimentacion.
Mester importa tecnologia y experto pa maneha Agri-Innovation Park
E proyecto cu Minister Wever encargca cu Sector Primario a presenta, Agri-Innovation Park ta lanta hopi preocupacion. Banda di cu ta opta pa cultiva un lista di fruta y berdura cu no ta di e cultura culinario di nos region, mester importa e tecnologia y e expertonan riba e tecnologia den e tipo di greenhouse cu kier introduci. Sin conta e mantencion cu lo bay ta necesario y e materialnan cu no ta wordo manufactura na Aruba, cu tambe mester wordo importa.
Sra. Thielman-van der Bliek ta conta cu tin pioneronan den agricultura y cria di bestia aki na Aruba cu pa hopi aña ta pidiendo pa ayudo, pero nan no ta haya oido. Ademas, e grupo di personanan interesa ta tambe birando mas grandi pasobra mas y mas persona ta wak e importancia pa cuida nos soberania alimenticio.
Sra. Thielman-van der Bliek ta enfatisa cu nos autodeterminacion pa scoge con nos kier biba ta hopi importante. Un di e pasonan importante pa tuma pa proteha nos soberania, nos autodeterminacion como individuo, comunidad y pais, ta door di sa con pa alimenta nos mes. Esaki nos por haci solamente si nos sa con pa cultiva den tera.
El a termina bisando cu e proyecto Agri-Innovation Park, su enfoke ta riba tendencia culinario pa sirbi bishitantenen y horeca enbes di cultiva berdura cu ta traha platonan tipoco di Aruba cu ne y sostene nos localnan.