Den fin di siman un biaha mas gobierno di Aruba a falta respet pa democracia, falta respet pa
Parlamento di Aruba, falta respet pa sindicatonan y falta respet pa pueblo di Aruba. Manera
un ladron di anochi gobierno di Aruba a manda 3 siman pasa caba e ley di reino Hofa
Hulanda pa asina trata y aproba esaki den conseho di minister di reino diabierna ultimo.
Gobierno di Aruba a haci esaki sin informa Parlamento, sin informa tur e sindicatonan cu ta
na mesa cu nan den dialogo social y sin informa pueblo.
Gobierno ta sconde informacion
Ora gobierno sende un luz na un rotonde nan ta bai live y haci yen di drama pero un tema
asina delicado y sensitivo manera entrega di nos Libertad y entrega di nos Status Aparte nan
no tin e decencia pa informa pueblo. Esaki ta un gobierno cu NO kier duna pueblo
informacion, no kier ta transparente y ta haci cosnan scondi pasobra nan sa cu NO tin sosten
den pueblo pa entrega nos Status Aparte.
Aruba NO kier un rijkswet! Den parlamento ya caba 10 di e 21 miembronan ta contra e
rijkswet, 13 sindicato cu ta representa miles di miembro tampoco kier e rijkswet y mas di
10.000 persona a firma e peticion contra e rijkswet. E ta obvio cu NOS NO POR PAPIA CU
TIN CONSENSUS!
Cuchiu den lomba di pueblo
Gobierno no kier respeta deseo di pueblo y pa un sakito di placa ta bay destrui nos Status
Aparte. Con gobierno kier nos celebra 40 aña di Status Aparte anto despues di 40 aña nan
mes ta kita esaki for di boso? No tin otro palabra pa esaki cu no ta: TRAICION!
CAFT a caba di duna su conseho riba presupuesto 2026. Den e conseho CAFT ta señala cu e
debe di pais Aruba (e debt to GDP) ta baha bao di 50% y yega na 47% na aña 2028. Desde
comienso ora a cuminsa e discusion riba rijkswet, e condicion di gobierno di Hulanda tawata
cu mester un finansas sostenibel y duradero e debe di pais Aruba lo mester ta bao di 50%.
Wel, Aruba a demostra cu nos mes por y ya aki 2 aña nos debe ta baha bao di e 50% aki. E
ora naturalmente nos mester puntra nos mes kico ta e urgencia y necesidad pa entrega nos
autonomia financiero ainda si nos a demostra cu nos mes por?
Con nan por papia di Amor pa Aruba?
Ta insolito pa pensa cu tin politiconan Arubiano manera Gerlien Croes, Geoffrey Wever y
Mike Eman cu kier pa nos celebra cu nos ta biba riba un pais liber anto kier entrega nos
libertad y bende nos pais pa un sakito di placa. Ta mas insolito pa pensa cu nan kier entrega
nos finansas publico, nos autonomia financiero siendo cu aki 2 aña caba nos debe di pais a
baha bao di 50%!
Aruba tin supervision financiero ancra den e landsverordening Aruba financieel toezicht,
Aruba ta cumpliendo cu tur e normanan, Aruba ta pagando su debenan cu Hulanda y ja caba
nos debe a baha cu 50% despues di e pandemia. Bisando esaki no tin ningun motibo valido y
ningun hustificacion pa accepta e rijkswet Hofa.
Libertad di un pais ta algo Sagrado
Nos ta un pais liber desde aña 1986 y danki na e libertdad aki nos pais por a prospera y
progresa. Nos tin awor E Libertad pa tuma nos propio decisionan, e Libertdad pa vota den
nos parlamento, e Libertad pa usa nos fondonan manera nos ta desea y tur esaki ta wordo kita
for di nos cu Rijkswet Hofa. E pregunta principal ta keda, dicon gobierno kier destrui nos
Status Aparte?