Parlamentario Eduard Pieters (PPA) ta pidi pa gobierno bin cu un forma nobo, humano y realistico pa combati e problema di e adictonan ambulante den Aruba. E ta enfatisa cu adiccion no ta un crimen, sino un malesa mental y e hendenan cu ta sufri di dje mester haya ayuda profesional y un trato digno.
Solucion digno y real
“Mester respeta e ley di curatela, pero tambe mester modific’e,” Pieters a bisa. “E hendenan aki tin un malesa mental y merece di haya atencion y ayudo profesional. Nos mester saca nan for di e ambiente aki, interna nan y duna nan un bon trato pa nan por rehabilita y reintegra den nos sociedad.”
Rehabilitacion y reintegracion concreto
Segun Pieters, e proyecto Ban Bek Caya a trece un alivio temporario pa e comerciantenan, pero no ta un solucion duradero. Apesar di esfuerzo di Cuerpo Policial di Aruba y otro instancia pa limpia centro di ciudad, e situacion na Parke Alameda y Caya Grandi ta mesun cos bek.
Pieters a reinforsa y recorda e declaracion di Alto Comisario Arnhem a expresa 1 luna pasa: “E hacimento limpi ta cosmetico y asina bo no ta logra gara e problema na su rais. Si e adictonan ambulante no kier haya ayuda boluntariamente, mester haya e ayudo obligatorio.
Pieters a laga sa cla cu e adictonan ambulante ta ser humano cu dignidad, paso nan por ta mama, tata, ruman, of yiu di algun hende. E pueblo no mester huzga nan, sino compronde cu nan ta pasa den momentonan dificil di bida y nan mester ayudo y compasion.
PPA su Vision 2050: Rehabilitacion obligatorio y reintegracion laboral
“Den e plan “Nos Aruba 2050”, PPA tin un strategia completo pa combina husticia cu cuido social. Den e plan aki, un persona cu comete un crimen relacona cu adiccion lo haya un programa di rehabilitacion obligatorio como parti di su castigo y esun cu ta adicto, pero no a comete crimen, mester wordo kita for di caya pa haya tratamento y guia pa reintegracion.
Pieters a expresa cu PPA lo manda un serie di pregunta na Minister Wyatt Ras y e coalicion di gobierno (AVP–Futuro), pa duna claridad riba e plan concreto, timeline pa implementa y ehecuta nan accionnan, cu ta poni den nan plan di gobernacion.
Un yamada final pa accion conhunto
“Si nos no traha hunto cu sector priva y social, e mesun adictonan lo bay rehabilita, pero sin trabou y sin apoyo nan lo cay bek den e problema. Aruba mester un sistema humano, structural y efectivo pa realmente nan cambia nan bida,” Pieters a conclui. El a enfatisa cu como gobierno y pais, nos mester trata e problema di adiccion cu curason y structura, paso no ta djis un deber moral, sino un inversion social pa tene un Aruba mas safe, resiliente y humano.
