Den e ritmo acelera di bida, hende homber na Aruba ta carga hopi rol: proveedor, protector, tata, pareha, amigo y lider. Pero Dia Internacional di Hende Homber no ta simplemente un reconocemento di e rol tradicional; e ta un invitacion profundo pa mira mas leu: con homber ta sinti realmente? Con nos ta guia nos famia? Con nos ta forma e compas moral di nos comunidad? Segun Eduard Pieters di fraccion di PPA, e dia aki no ta pa glorifica machismo, sino pa celebra integridad, responsabilidad y salud emocional, cu ta tres area cu mester hopi mas atencion na nos isla.
Hende homber na Aruba: entre expectativa y realidad
Segun Eduard Pieters: “Hopi hende homber ta sinti presion pa presta constantemente: gana placa, ta fuerte, no mustra emocion y “resolve tur cos.” E expectativa aki ta crea un crisis silencioso di salud mental, manera; depresion y ansiedad, violencia domestico, cu den hopi caso ta conecta cu frustracion y falta di maneho di emocion y presencia familiar, cu ta bira limita door di e orarionan di trabou largo, multi- empleo y cansancio structural. Riba e dia aki, nos mester reflexiona y realmente duna hende homber mas espacio pa expresa su emocionnan, pidi ayudo y p’e no sinti cu ta huzg’e. Un comunidad fuerte ta nace di homber cu ta sano den e aspecto fisico, emocional y mentalmente”.
Responsabilidad di hende homber: Liderasgo sin abuso, forsa y violencia
Hende homber ta hunga un papel crucial den formacion di nos sociedad. Pero liderasgo no ta uza poder; liderasgo ta ehempel. “Como tata, bo ta e prome modelo pa respet, disciplina y amor. Como pareha, bo rol ta cuida, comunica y construi relacion, no controla. Como ciudadano, bo responsabilidad ta protega y vigila tur loke ta pasa rond di bo,” Eduard a enfatisa.
Na Aruba nos ta mira un transformacion: mas homber ta tuma rol activo den criansa, den comunidad y den e area di boluntario. Esaki ta un cambio cu mester wordo reforza cu maneho structural, programa di salud, y espacio di educacion cu ta traha riba e topico di masculinidad positivo.
Con nos por sostene nos hende hombernan?
“Hende homber no por crece sano si no tin un bon fundeshi for di chikito. Esaki ta labor no solamente di e mama of ser femenino, pero di e tata tambe y di nos tur. Nos tin cu percura cu for di chikito ta inculca den nos mucha hombernan e sentido di responsabilidad, brinda amor y cariño, expresa emocion y regula y controla e emocionnan na un manera responsabel y corecto. Nos tin cu inculca for di chikito kico ta respet y empatia y cu un hende homber den nos comunidad ta un parti crucial y mester crea espacio pa hende homber por papia y busca ayudo ora e tin mester di dje,” Eduard a sigui amplia.
Finalmente Eduard Pieters ta accentua cu e Dia Internacional di Hende Homber, mester ta un recordatorio cu hende homber no ta simbolisa solamente musculo y forsa, pero tambe emocion, responsabilidad, dignidad y curashi. “Un pais cu no ta cuida su sernan masculino, no por spera cu nan lo cuida di nan famia ni di su comunidad. Pa fraccion di PPA esaki ta un punto crucial: si nos ke un Aruba integro, safe y husto, nos mester nutri un masculinidad saludabel, basa riba respet, bienestar y humanidad. Homber sano ta crea famia sano y un famia sano ta crea un Aruba cu por lanta den paz, forsa y dignidad.
Press release: PPA