Diahuebs mainta, parlamentario Eduard Pieters di fraccion di PPA a participa na un bishita
oficial na AWSS, cu tabata un invitacion dirigi na tur miembro di Parlamento. E bishita a
concentra riba e incinerator nobo cu AWSS a busca pa implementa, incluyendo un rondleiding
completo di e operacion actual y e futuro mobile incinerator. Esaki no ta un tema nobo, pero si
un tema urgente, specialmente ora nos ta papia di seguridad di comunidad y maneho
responsabel di desperdicio en general, specialmente esun medico.
Un problema conoci cu a keda sin solucion
Segun Eduard Pieters: “Desde aña pasa, fraccion di PPA a trece repetidamente e preocupacion
tocante e.o. e containernan cu desperdicio medico cu AWSS a hereda. E containernan aki ta
forma un riesgo real pa e barionan manera Parkietenbos, Simon Antonio y e bisindario”.
Durante e bishita, e realidad a bira pio: riba 70 container cu medical waste ta wardando pa
procesa na un manera safe.
“Esaki no ta un problema di awe. 27 aña pasa, ya tabatin rapport profesional cu a indica cu un
incinerator tabata e direccion corecto pa Aruba como pais chikito. Pa mas di dos decada, e
advertencianan aki a keda ignora. Shete aña pasa, den gobernacion anterior, un comision di
experto, lidera pa ingeniero Jossy Lacle y cu participacion di e partnernan tecnico,
stakeholdernan y e propio habitantenan di e bario, a yega na e mesun conclusion: Aruba mester
un incinerator moderno y safe,” Eduard a expresa.
Un pregunta cu hopi hende, incluso Eduard ta haci ta: “Pakico a boycotia y retrasa pa asina
tanto aña, e proyecto di incinerator, a pesar di consenso tecnico y comunitario? Awe, shete aña
despues, nos ta tende atrobe cu incinerator “ta bon pa Aruba”. E pregunta legitimo ta: pakico
nos tin cu duda di nos propio expertonan, comision y poblacion cada biaha?”
Tecnologia moderno, no mito antiguo
E incinerator nobo cu AWSS ta propone no tin nada di compara cu e modelonan bieu cu hopi
hende tin den mente. “Esaki ta un state-of-the-art, un sistema cu ta uza tecnologia hopi
eficiente y limpi. E sistema no ta uza diesel, sino LPG, pa cual AWSS a cera un convenio cu
Arugas y e consumo di LPG ta minimo, paso e proceso di kimamento di medical waste ta
altamente eficiente”.
Segun e splicacionnan tecnico, e uzo di combustibel ta asina bon controla, cu no ta genera e
tipo di polucion cu hopi hende ta pensa. Esaki ta un solucion cu ta proteha salud publico, medio
ambiente y seguridad di e comunidad, sin carga innecesario riba nos ecosistema.
Un paso responsabel pa Aruba
Cu e implementacion di e incinerator nobo, Aruba porfin lo por deshaci di medical waste di
manera safe y definitivo, eliminando un riesgo cu a persisti pa hopi aña. Esaki ta un paso
responsabel, basa riba ciencia, experiencia y necesidad real.
Fraccion di PPA kier duna un pabien na AWSS pa e progreso alcansa y pa e decision cu porfin ta
implementa e incinerator. “Aruba no por sigui pospone e solucionnan tecnico, cu ta proteha
nos pueblo. Un incinerator moderno no ta un luho, ta un necesidad. E bishita di ayera a
confirma cu e caminda aki, ta esun corecto: uno di responsabilidad, seguridad y respet pa nos
comunidad y nos medio ambiente”, Eduard Pieters a finalisa bisando.
