Parlamentario Eduard Pieters a expresa su preocupacion serio tocante diferente aspecto, cu ainda no ta suficientemente cla, specialmente ora ta trata un proyecto asina importante cu tin un impacto potencial grandi riba comunidad y entorno. Durante un encuentro di Fundacion Consenshi di Pueblo di Aruba (CONPA), Parlamentario Pieters a haya un splicacion y bista di e areanan cu posibelmente por keda afecta pa e Plan di Bibienda di Burunbundo y tambe e alternativa cu CONPA ta sugeri.
Discusion mester bay Parlamento
Pieters a enfatisa cu PPA no ta contra desaroyo, ni contra inversion. Pero precisamente ora ta trata di proyecto grandi cu por afecta tereno, naturaleza, comunidad, siguridad y futuro di Aruba, Parlamento tin obligacion pa wak mas profundo. “Mi por compronde cu tin proyecto cu ta tuma hopi aña pa madura, pero ora e yega Parlamento cu hopi buraco aden, nos no por actua manera cu tur cos ta cla,” Pieters a indica.
Fundacion tambe ta expresa preocupacion
Segun Pieters, durante e encuentro y consulta, e fundacion y e actornan relevante cu tin conocemento di e area tambe a expresa diferente inkietud tocante e impacto di e desaroyo riba nos naturalesa. Nan preocupacionnan no por considera como un detaye chikito, pasobra nan ta enfoca riba e base di e proyecto mes: uzo di tereno, restriccion existente y impacto directo y indirecto riba e area natural. “Ami a bin e encuentro y ta evidente cu ainda tin preocupacionnan legitimo cu mester ta atendi, prome cu nos sigui dilanti.”
Regla pa algun y flexibilidad pa otro?
Un di e puntonan cu mas a yama atencion di PPA ta loke parce di ta un trato diferente den aplicacion di cierto restriccion teritorial. Pieters a señala cu den diferente ocasion, ciudadano y inversionista a haya nan mes confronta cu e limitacionnan severo tocante uzo di terreno basa riba LRO, ROP(V).
Sinembargo, den e caso aki, e verkavelingsplan sin nomber di por lo menos di mil residente y di varios piso den proximidad di un area natural sensitivo, ta parce cu no ta niun problema.
“Pueblo tin derecho di puntra y sa si e mesun reglanan ta aplica pa tur hende of si den cierto verkavelingsplan ta haya flexibilidad y excepcion,” Pieters a cuestiona.
Parlamento mester haci su trabou
Segun Pieters, precisamente pa e motibo ey, su persona como lider di fraccion di PPA lo solicita na presidente di Comision di Infrastructura pa un reunion formal cu CONPA pa nan presenta informacion adicional na Parlamento. Pa PPA, esaki no ta un intento pa stroba desaroyo, sino un accion pa garantisa cu e decisionnan importante ta tuma cu suficiente informacion y cu total transparencia.
“Nos rol como parlamentario no ta simpelmente aproba proyecto. Nos rol ta pa proteha interes general di Aruba y percura cu desaroyo ta haci den forma responsabel.”
Transparencia ta yuda crea confiansa
Pieters a conclui cu desaroyo responsabel ta exigi mas cu djis promesa bunita. Ta exigi informacion, transparencia y respet pa naturalesa, comunidad y Estado di Derecho. Aruba tin necesidad di inversion y progreso, pero progreso sostenibel ta exigi claridad, participacion y confiansa publico. “Desaroyo cu ta realmente bon pa Aruba no mester tin miedo di pregunta. Al contrario, e ta contesta nan,” Eduard Pieters a conclui.
