Parlamentario Endy Croes ta lansa un critica fuerte riba e forma con
Aruba ta wordo goberna awe. Segun Croes, ta increibel con e partido mas grandi, AVP,
a bira un "marioneta" den man di partido Futuro. Mientras Gerlien Croes y Geoffrey
Wever ta dicta kico mester pasa, AVP ta djis bisa “Amen” na tur cos, sin importa cu
nan ta bende nos autonomia y nos futuro.
Dos Minister cu ta manda tur cos
Parlamentario Croes ta splica cu nunca el a mira un AVP asina debil. Desde aña 2025, ta
bisto cu Minister Gerlien Croes y Minister Geoffrey Wever ta esnan cu ta manda den e
Gabinete aki.
“Gerlien Croes, kende ya tin e fama di sconde berdad (manera e asunto di e private jet), hunto
cu Geoffrey Wever, kende kier mete den cartera di tur hende sin worry, ta esnan cu ta tuma
tur decision,” Croes a declara. Segun e Parlamentario, e dos ministernan aki di Futuro ta
pushando pa entrega nos autonomia na Hulanda a traves di e Rijkswet HOFA, y AVP ta keda
den silencio complice.
Bendiendo nos autonomia "manera ladron den anochi"
Croes ta recorda pueblo cu e firmamento di e Rijkswet HOFA a wordo haci scondi pa
Parlamento, casi manera ladron den anochi. MEP a lanta den accion y a logra mas di 10.000
firma di ciudadano cu no ta duna permiso pa bende nos autonomia.
Incluso durante e dianan di IPKO, parlamentarionan Hulandes mes tabata puntra dicon e
miembronan di Futuro, Muzaninn y Lindor, tabata asina ansha y pura pa bini cu e ley aki.
“Ta un berguensa cu un persona cu apenas 70 voto kier bende e lucha di e pais aki, pero nos
ta positivo cu tin mas di 11 Parlamentario cu lo para esaki na final,” Endy Croes a enfatisa.
Gobierno kier desmantela nos oportunidad di ORO
E otro punto cu ta preocupa MEP ta e descuido pa nos economia. Mike Eman y Arthur
Dowers a hiba e Hulandesnan un tour pa mira e refineria, pero cu un solo meta: desmantela
tur cos mas liher posibel. Esaki atrobe ta e agenda di Futuro cu Gerlien y Geoffrey ta
pushando.
“Nan no kier ni scucha di e oportunidad di ORO cu tin awo cu e cambionan den region y e
vision di Merca,” Croes a splica. Mientras multinacionalnan ta inverti biyones den nos bisiña,
Gobierno di Aruba kier cera wowo. MEP a splica e Hulandesnan cu Aruba por gana mas di
80 miyon dollar pa aña djis uza nos tankinan pa warda petroleo (Tankfarm).
Conclusion
Parlamentario Endy Croes ta termina bisando cu e bienestar di Aruba mester bin prome cu
interes di partido. “Nos ta keda alerta. No por ta asina cu un partido chikito ta dicta e futuro
di nos tur djis pasobra AVP no tin e curashi di para firme. Nos mester un di dos pilar
economico y nos mester proteha nos autonomia.”