Parlamentario Endy Croes a repasa enbreve e reunion publico cu a tuma lugar den Parlamento di Aruba diabierna ultimo. Diabierna ultimo a trata cuentanan anual di añanan 2016,2017 y 2018. Manera ta conosi esaki tambe ta un precupacion di Hulanda y constantemente CAFT den su consehonan na Gobierno Hulandes ta accentua cu Aruba no tin su cuentanan anual na ordo. Te hasta den Tweede Kamer durante reunion esaki a wordo ripiti pa Parlamentarionan Hulandes refiriendo na consehonan di CAFT. Pues ta di suma importancia pa Aruba logra trata esakinan y haña e saldo(nan) di respectivo añanan aproba door di Parlamento. Tanto cuentanan anual aproba door di Parlamento y “goed gekeurde accountant verklaring” ta precupacion imenso di Hulanda. Parlamento a resolve diabierna ultimo mas cu mitar di Hulanda su precupacion aprobando cuantanan anual di 2016,2017,2018.
Parlamento a aproba alaves un amienda pa mantene AVP responsabel:
Dia 14 di november 2018 momento e Parlamento nobo a trata cuanta anual di 2016 esaki NO a keda aproba. A manda diferente preguntanan bek pa e Minister nobo cu no tin ni arte ni parte den esaki pero como cu ta e Minister den funcion na e momentonan ey y como cu gobernacion ta un continuacion e minister nobo mester a deal cu esaki. Finalmente aunke tin hopi preguntanan alrespecto e malgastamento “feroz” di Mike Eman y AVP e yega na un acuerdo pa e pais por sigui draai. Parlamento a bini cu un amienda durante cu a trata e ley aki. E amienda ta stipula hopi kla cu e Minister di e tempo aya lo keda responsabel pa tur su actonan y no lo ricibi e asina jama “discharge”of ontslag. Pues cualkier investigacion cu lo tuma lugar semper e minister di AVP di dicho aña lo keda responsabel. Cu e amienda aki aproba, a bay over na aproba e saldo di cuentanan anual 2016,2017 y 2018.
Algemene Rekenkamer a confirma e desaster di Mike Eman y AVP:
Algemene Rekenkamer den su investigacion hasi alrespecto añanan 2016 y 2017 a baha fuerte riba gobierno di Mike Eman. Por ehempel pagina 4 (2016) “ Algemene Rekenkamer ta constata un biaha mas cu gastonan ta surpasa e presupuesto aproba door di Parlamento”. E hecho aki ta ilegitimo di acuerdo cu Algemene Rekenkamer. Un otro passage “ Algemene Rekenkamer ta conseha Parlamento pa “NO TOLERA” cu gobierno ta perhudica e derecho presustario. Riba pagina 6 por lese” Tevens wordt aanbevolen, om niet langer te tolereren dat het budgetrecht wordt aangetast”.
Arthur Dowers a contruibi na e desaster financiero:
Di acuerdo cu Algemene Rekenkamer cu x Minister di Husticia Arthur Dowers ta un di e culpabelnan grandi kende a aporta na e desaster financiero cu AVP a laga atras. Asina nos por lesa riba pagina 49 di e rapport di 2016” De Top 5 overschrijdingen doen zich allemaal voor bij hoofdbudgethouders ressorterend onder het minister van Justitie. Zoals eerder vermeld, merkt de Algemene Rekenkamer begrotingsoverschrijdingen als onrechtmatig.” Pues aki Algemene Rekenkamer a bati masha duro riba e dedenan largo di Arthur Dowers. Pa e motibonan aki ningun pero ningun Parlamentario di AVP a hiba palabra durante reunion y a keda scondi den nan kamber durante henter e debate.
Pa bienestar general a aproba e cuentanan anual:
Manera a splika mas ariba. Pa bienestar general a aproba e “saldonan” di cuentanan anual 2016-2017 y 2018. Asina por tin continuacion di gobernacion. Lokual si a bini extra ta e amienda cu ta mantene e x ministernan di AVP cu a causa e Mega Debe y e desaster financiero personalmente responsabel pa tur nan actonan. Cu e condicion nobo aki a bay over na aprobacion. Den otro artikel lo amplia riba diferente passagesnan di dicho rapportnan constatando e “masacre” di AVP.
