Despues di 8 luna den gobernacion;
Manera ta conoci ya ta 8 luna caba cu Aruba a bay urna electoral, y pa un diferencia di apenas 300 voto a conoce un Gobierno nobo. E 2 partidonan AVP y Futuro cu a dicidi di uni como Gobierno, a campaña cu promesanan hopi grandi di cual awe ta mustra cu nan no por cumpli cu e promesanan aki.
Parlamentario Evelyn Wever-Croes a expresa cu e situacion actual di pais Aruba ta uno preocupante. Na e momentonan aki, pais Aruba ta un pais sin lidersago, sin transparencia, un pais cu no ta mustra e compromiso di bay padilanti. “Nos a traha hopi duro durante nos gobernacion, pa hiba nos pais padilanti. Y ora mi bisa “nos”, mi kiermen henter
Aruba. Pasobra ta hunto a lora manga, sera cabes y traha hunto pa hiba Aruba dilanti despues di e pandemia. Y aworaki ta importante pa sigui den e mesun ritmo aki di crecemento y desaroyo.
E ta nos trabou como oposicion pa sigui busca informacion, controla y stimula e Gobierno aki pa tuma e decisionnan corecto, den transparencia cu comunidad y cu interes di pueblo general na prome luga.
Den cuadro di nos trabounan den Parlamento, nos di partido MEP a haci mas di 1000 pregunta na e Gobierno aki di cual ta apenas 100 nan a contesta. Nos lo sigui pone precion pa haya e contestanan pasobra ta atraves di e preguntanan aki nos ta haya informacion di maneho, nos por mira si e decisionnan cu nan ta tuma ta yuda e pueblo, y si a tene cuenta cu e riesgonan grandi cu nan ta tumando den e decisionnan di tur dia.
Comunidad di Aruba por conta partido MEP den oposicion cu lo tey y lo bringa pa e miho interes di pueblo wordo sirbi” Parlamentario Wever-Croes a expresa.