Hendrik Tevreden, parlamentario di Movimiento Electoral di Pueblo (MEP), a expresa su descontento cu e desaroyo di IPKO 2026, indicando cu e reunion no a cumpli cu su proposito original.
Segun Tevreden, IPKO a wordo crea pa debati puntonan critico cu e islanan ta confronta y pa busca solucionnan conhunto. Sinembargo, el a señala cu e edicion di 2026 tabata enfoca mas riba presentacionnan cu poco espacio pa debate profundo y formulacion di solucionnan concreto.
E parlamentario a lamenta cu e contenido di IPKO a cambia, loke, segun Tevreden, ta pone cu e plataforma ta perde su balor principal como espacio di discusion y cooperacion entre e paisnan.
En cuanto na e situacion di HOFA, Tevreden a indica cu ainda e Raad van Advies no a emiti su conseho, loke ta mantene e asunto para. El a critica e maneho di Geoffrey Wever, afirmando cu minister a actua contra ley y constitucion di Pais Aruba. Te awor, segun Tevreden, ningun miembro di gabinete no a sali publicamente pa duna aclaracion riba e tema.