Mientras e discusion ta continua rond di e ceramento di rutanan y proteccion di naturalesa, Parlamentario Hendrik Tevreden ta señala cu e impasse actual ta afecta directamente alrededor di 800 trahador y nan famia cu ta depende di e sector di excursion turistico.
E necesidad pa regulacion, dialogo y mantencion di ley
Den e reunion cu e tour operatornan cu a tuma luga dia 27 di augustus ultimo, a sali na cla cu e reto actual ta bay mas leu cu un desacuerdo tocante un ruta specifico. E situacion aki ta refleha un problema mas profundo: un sector cu a funciona hopi tempo sin regulacion, identificacion ni control adecuado, y sin un intermediario gubernamental cu ta asumi e responsabilidad pa facilita un dialogo structura entre tur partido.
E tour operatornan cu ta opera den e cuadro legal ta subraya cu nan no ta contra e preservacion di nos naturalesa. Al contrario, nan ta consciente cu e recursonan natural di Aruba mester wordo protehi. Sinembargo, nan ta enfatisa cu un politica di proteccion efectivo mester bay man den man cu regulacion, dialogo y mantencion di ley.
Falta di control di T-vergunning y e realidad di e operadornan legal
E sistema di T-vergunning actual ta deficiente: sin un identificacion obligatorio visible riba e vehiculonan, autoridadnan no por distingui entre un operador legal y uno ilegal, provocando cu e companianan cu tin nan papelnan na ordo ta paga e consecuencia di otronan.
Ademas, e debate publico no ta husto ora ta presenta tur tour operator como si fuera nan ta practica “off-road” sin ningun tipo di control. E companianan legal ta enfatisa cu nan actividadnan ta consisti di guided sightseeing riba rutanan existente y structura, haciendo uzo di GPS pa garantisa e orden.
Ekilibrio economico y ambiental
Proteccion di naturalesa no mester bira sinonimo di eliminacion di actividad economico. E reto ta precisamente pa determina unda por core, unda no por core y bou cua condicion. Esaki ta unda rol di gobierno ta crucial.
E sector ta cuestiona e ceramento abrupto di rutanan sin consulta previo cu un industria cu a organisa su operacion, personal y reservacionnan rond di e producto aki. Nan ta señala cu un di e rutanan cuestiona ta un caminda di tera publico (openbare zandweg) cu DOW ta mantene periodicamente. Alabes, e situacion ta bira mas delicado debi na e caso hudicial cu Aruba Birdlife Conservation a cuminsa contra Land Aruba y e tour operatornan.
Gobierno no por sconde tras di un proceso hudicial
Tevreden ta remarca cu e echo cu tin un proceso hudicial andando no ta kita gobierno su responsabilidad pa goberna. Segun informacion comparti pa e propio sector, nan ta sperando pa mas di tres luna riba un reaccion concreto. A pesar cu Minister Wendrick Cicilia a compromete su mes anteriormente pa coordina un reunion di trabou cu Minister Dowers, Minister Herdé y Prome Minister Eman, e encuentro aki nunca a materialisa. E unico contesta cu e sector a ricibi for di Minister Dowers y DTP ta cu e asunto ta den man di hues.
“E proceso hudicial aki no por bira un excusa pa inaccion ni pa un paralisis politico,” Tevreden a enfatisa. Mientras Gobierno ta warda, e empresarionan mester sigui cumpli cu salarionan, e trahadonan mester paga nan cas y e famianan mester pone cuminda riba mesa.
Impacto economico y e necesidad di un solucion
E incertidumbre aki ta afecta seriamente e cadena economico di Aruba. UTV, ATV y Jeep tours ta forma parti di e oferta di excursion cu miles di bishitante ta adkiri, y e falta di un alternativa structura por trece consecuencianan grave pa tour operators, taxista, guia, mecanico, proveedor y e relacion cu e mercado di crucero.
E solucion no ta laga naturalesa sin proteccion, ni tampoco laga un sector opera sin regla. E solucion ta regulacion.
Fraccion di MEP ta haci un yamada urgente na Gobierno pa e asumi su rol y trece DNM, DTP, DOW, autoridadnan relevante, organisacionnan ambiental y e tour operatornan legal na e mesun mesa pa:
*Identifica tur vehiculo legalmente autorisa y combati e operadornan ilegal.
*Establece rutanan oficial y determina e zonanan di proteccion absoluto.
*Implementa reglanan cla, sancionnan efectivo y un sistema di control estricto.
Aruba por proteha su naturalesa y na mesun tempo proteha e puestonan di trabou. Pero pa logra esey, gobierno mester sali for di e impasse y cuminsa goberna. Pasobra mientras e silencio continua, no ta solamente companianan cu ta den incertidumbre ta sufri pero esnan cu ta depende di nan tambe.
Ta alrededor di 800 trahador cu cada mainta ta puntra nan mes: mi lo tin trabou mañan ainda?