Riba dialuna 27 di februari 2023 e respectivo Parlamentonan di Sint Maarten, Corsou y Aruba a tene nan prome reunion di Tripartiet. Den e mesun siman aki di 28 di februari pa 3 di maart 2023 a tene e reunionnan di IPKO (Interparlementair Koninkrijksoverleg) na isla di Corsou.
Tripartiet
Den e reunion di Tripartiet a discuti e temanan cu a wordo treci dilanti door di e islanan, cu ta entre otro e fluho migratorio den reino y e concepto di un geschillenregeling. E topico di e fluho migratorio ta relaciona na e habrimento di frontera cu Venezuela proximamente. Tambe con lo atende cu e aspectonan cu ta relata na e tema aki na un manera mas efectivo y beneficioso pa e paisnan Hulandes den Caribe. Pa loke ta e topico di e geschillenregeling, e concepto final a keda presenta y aproba den e Tripartiet. E dicho concepto aki a keda presenta y discuti tambe den e reunionnan di IPKO. Un punto importante cu a resalta den e Tripartiet ta, cu e paisnan den reino di e parti Caribense lo desea di intensiva nan contactonan anual cu otro.
IPKO
Durante di IPKO tambe a bin diferente puntonan importante dilanti. Di cual mi persona a discuti y elabora principalmente riba e topiconan di educacion y e pasado di esclabitud y colonialismo. Pa loke ta concerni e topico di educacion, mi persona a señala riba dos punto importante pa Aruba. Punto 1 ta e rapport di e Ombudsman di Hulanda caminda ta splica di e situacion di e studiantenan Arubiano compara cu esnan di e islanan BES na Hulanda. Den cual studiantenan Arubiano tin un problema cu ricibi un BSN-nummer mas pronto cu ta posibel pa asina nan por registra na e gemeentenan na Hulanda. Sin e BSN-nummer studiantenan no por haya cas, habri cuenta di banco, etc. Tambe mi a trece dilanti e punto di LVB (Lichtverstandelijke beperking) cu ta hopi importante si Hulanda lo por brinda sosten di experticio riba e punto aki. Esaki lo por yuda nos hobennan na Aruba y tambe otro islanan tanto den e area di educacion y mantene nan for di cay den man di husticia.
Tambe mi persona elabora riba e tema di e pasado di esclabitud y colonialismo. Pa Aruba (y tambe e otro paisnan den reino), ta importante cu Aruba por haya acceso na e documentonan historico cu ta den archivonan na Hulanda, London, Sevilla y Coro. Cu acceso na e documentonan aki, Aruba por sigui cu su proyecto di digitalisacion di su historia y tambe aporta na e historia y formacion di curiculo di enseñansa mas amplio y concreto den Reino Hulandes.
E reunionnan di Tripartiet y IPKO ta y lo keda importante pa fortifica a relacionnan den reino y tambe pa e paisnan por sostene otro y hunto traha na e desaroyo di e ciudadanonan di Reino Hulandes.