Despues di mas di 15 rapel sin ningun resultado, finalmente e silencio di Presidente di Parlamento a wordo kibra. Sinembargo, esaki no a sosode pa boluntad propio.
Riba 16 di juli 2026, Gabinete di Gobernador a manda un carta oficial na Parlamentario Rocco Tjon. Den e carta ta para cla: e keho presenta dia 13 di juli ultimo a wordo pasa pa Presidente di Parlamento, señor Sneek, cu e peticion directo pa trata e keho aki y pa manda un copia di su contesta bek pa Gabinete di Gobernador. Segun Tjon, esaki ta e prome biaha den historia recien cu Gobernador mester a interveni directamente pa forsa Presidente di Parlamento pa cumpli cu su deber.
Un total di 15 peticion ignora
Tjon a splica cu parlamentarionan a pidi un vragenuur cu Minister Gerlien Croes pa trata e asunto rond di e Jet Priva. Den e transcurso aki, nan a manda mas di 15 carta pa Presidente di Parlamento, pero no a ricibi ningun contesta. Pa e motibo aki, nan a dirigi mas di 15 carta na Gobernador pa inform’e cu e poder di control di Parlamento ta wordo obstaculisa.
E parlamentario a enfatisa cu e asunto aki ta serio, ya cu ta trata di un minister cu ta nenga di mustra prueba di un biahe financia cu placa di pueblo. Apesar di e gravedad, Tjon ta señala cu Presidente di Parlamento a prefera di no haci nada.
Un precedente sin igual den historia di nos pais
Tjon a cuestiona kico tin pa sconde den e caso aki. El a subraya cu e echo cu Gobernador a sinti e necesidad di duna instruccion y pidi un copia di e contesta (afschrift), ta un prueba di con leu e situacion aki a degenera.
E Presidente di Parlamento, cu mester defende derecho di pueblo pa control, a bira e muraya cu ta tapa transparencia. Finalmente, Tjon a expresa cu pueblo merece un Parlamento cu ta funciona debidamente, y no un Presidente cu ta move solamente ora Gobernador toca na su porta. “Pueblo merece un Parlamento cu ta funciona y un Presidente cu no ta warda instruccion di Gobernador pa cumpli cu su deber,” Parlamentario Tjon a finalisa bisando.
