Diahuebs dia 23 di december 2021 e miembronan di prensa 24ora.com y radioemisora Hit94 a ricibi un carta di Minister di Comunicacion, señor Geoffrey Wever. E Minister ta denuncia cu 24ora.com y Hit94 ta duna un plataforma na e lider politico Michael Williams. E problema ta cu Michael Williams a duna su comentario riba e detencion di su yiu y esaki no a cay na agrado di e gobernantenan. Segun Minister Geoffrey Wever e declaracionnan di Michael Williams ta menasanan contra diferente minister. P’esey e minister ta haya cu mester bin cu medida contra señor Johnny Habibe y contra media en general. Ta menasa Johnny cu ta traha mas cu 50 aña den periodismo di kita e radioemisora for di dje. Tambe ta menasa prensa cu lo introduci un Mediaraad y un time delay system pa garantisa censura.
Pero tin pifia grandi den e cartanan. Na prome luga, Minister Geoffrey Wever aparentemente ta laga su mes wordo uza pa silencia personanan cu Prome Minister no ta gusta. Na di dos luga, e cartanan ta mustra un hipocresia alarmante di Gabinete Wever-Croes II. Manera tur hende sa MEP y sñora Evelyn Wever-Croes ta haci uzo frecuente di atakenan personal, “name calling” y ta uza hasta e Nazi-card, aparentemente pa motibo di falta di capacidad intelectual. Finalmente, e contenido di e cartanan ta hopi defectuoso for di un punto di bista constitucional. Ta un lastima cu Minister Geoffrey Wever, cu ta un (ex?) profesor de derecho constitucional na Universidad di Aruba, a durf di manda cartanan asina pa miebronan di prensa. Como profesor di derecho constitucional e ta conoce e doctrina di libertad di expresion y e libertad di prensa. E sa cu articulo I.12 di nos Constitucion ta dicta cu ningun hende mester di permiso previo pa por expresa su opinion. Esaki ta conta ainda mas pa nos prensa. Ademas, e di dos inciso di articulo I.12 ta stipula claramente cu no ta existi supervision previo di e contenido di un emision di radio of television. P’esey no por censura. Censura ta absolutamente prohibi den nos derecho constitucional. E establecimento di un Mediaraad di e manera cu Minister Geoffrey Wever kier y e introduccion di un time delay system ta claramente contra nos Constitucion.