Dialuna mainta pa mas o menos 9:50, central di polis ta wordo notifica di un accidente basta serio na altura di Do It Center na Savaneta.
Na yegada di patruya di Polis ta bin topa cu un auto marca KIA Model Picanto color cora numera A-62264 y un Nissan March color preto numera A-58473.
E señora den e Kia Picanto bayendo direccion pabao aparentemente a bira malo tras di stuur y a bay dal den Nissan March Preto bayendo direccion pariba.
A pidi ambulance cu urgencia mirando e situacion di e señora. Na yegada di personal di ambulance a atende e señora y a stabilise y bay cune cu maximo urgencia pa hospital.
Polis a cera e caminda pa asina ambulance por a transporta e victima pa hospital pa haya tratamento medico avansa.
Polis di trafico y di tecnico a presenta na e sitio pa haci nan investigacion. Departamento di slachtofferhulp a presenta pa duna famia sosten den e momentonan aki.