Diaranson mainta, un dia despues di apertura di aña parlamentario nobo, mi a pasa cerca Presidente di Parlamento pa por haya copia di e manifiesto entrega pa un grupo di 7 señora cu a bin pa protesta na Parlamento. E grupo aki tabata lidera pa sra. Hijmering cu ta conoci como un sostenedor di AVP.
Pa mi sorpresa mi a keda informa door di Presidente di Parlamento cu nan no a entrega ningun manifiesto ayera. E no a ricibi nada. Realidad ta cu e supuesto manifestacion a resulta di ta un otro stunt politico fracasa di Mike Eman y AVP. Un falta di seriedad total. Banda cu ful e “show” aki tabata orkestra pa Mike Eman himself, mi ta di opinion cu un biaha mas e ta tuma pueblo haci. Un muestra di desesperacion total unda ta hunga cu supuesto dolor di pueblo y hendenan, sin berdaderamente ta tuma esakinan na serio. E por a tuma sikiera e decensia pa no solamente uza e grupo di hende muhernan pa haya atencion pero skirbi tambe, mescos cu nan a percura pa nan pancartanan, e manifiesto cu nan a menciona pero nunca a entrega. Asina preocupa nan tabata.
Cu pueblo por bin protesta, esey por anytime, pero lastimamente esaki no tabata e caso. Mas bien e desesperacion di Mike ta asina grandi cu e no sa mas kico pa haci. Door cu e sa y ta sinti cu e no tin sosten di pueblo, e mester “fabrica” esaki. Ta con baho mas AVP lo bay?Banda di esaki, un biaha mas, Mike Eman y partido AVP ta kere cu nan ta riba tur regla y ta deha di cumpli cu reglanan existente di Parlamento y cu ta bon conoci pa nan. Pero cu Mike y AVP no tin cuenta cu regla y ley ta algo cu no ta sorprende nos mas. Casonan Ibis y Avestruz sigur ta subraya esaki.
Otro aspecto lamentabel di e suceso di ayera ta cu cada miembro di nos Fraccion a keda agredi verbalmente door di un of mas miembro di e grupo aki, sin ningun motibo valido. Tur esaki riba instruccion di nan Lider Mike Eman. Pero no ta fraccion di MEP so, tambe fraccion di Raiz, Ministernan di Gabinete Wever-Croes y te hasta Gobernador. Un hecho hopi lamentabel riba un dia asina importante y cu un sala di parlamento yena di invitado. Un berguensa atrobe pa Parlamento ocaciona pa AVP.
Como lider di Fraccion mi a pidi Presidente di Parlamento pa pone riba agenda di CHA pa nos atende e suceso, esta con e por a tuma lugar, con ta bay percura pa cumplimento cu e reglanan di siguridad y comportacion, ken ta encarga cu esaki y si por percura pa responsabilisacion y por ultimo con ta bay percura pa algo asina no ripiti mas.
Na Aruba nos mester stop di tuma siguridad di Parlamentarionan y nos invitadonan a la lihera. No ban warda algo pasa pa nos tuma esakinan na serio.