Un gobierno debilita, fragmenta, sin liderato, na unda poder interno ta mas importante cu responsabilidad colectivo
Den reunion publico riba Ley di LIM, lider di Fraccion di AVP a presenta un mocion pa pidi su Gobierno di AVP FUTURO pa nombra un Gevolmachtigde Minister na Hulanda (GevMIn) mas pronto cu ta posibel. Segun AVP e funcion ta vacante of ta wordo waargenomen y esaki ta pone continuidad, representacion diplomatico y e interesnan di Aruba den Reino na riesgo.
Un berguensa politico
Ta un berguensa cu un partido cu ta forma parti di e coalicion di gobierno mes, mester bin cu un mocion pa forsa su propio gobierno pa haci algo cu mester ta obvio y prioritario, siendo cu e tin su base den Statuut di Reino Hulandes. Esaki no ta un mocion di oposicion, esaki ta un grito di alarma for di paden di AVP contra FUTURO. E pregunta logico cu ta bin na mente ta, si AVP ta e partner mas grandi den gobierno, dicon e no por resolve e problema akiinternamente? Con un partido den coalicion mester uza Parlamento pa manda un señal pa su propio gabinete?
AVP FUTURO no ta papia cu otro
E situacion aki ta revela algo mas grandi:
un Gobierno cu no ta comunica, no ta coordina y no ta tuma decision hunto. Si un coalicion no por papia riba un puesto tan esencial manera un GevMin, cu ta Aruba su bos na Hulanda y den Reino Hulandes, ta con e mesun coalicion aki por goberna na bienestar y stabilidad di Aruba?
E GevMin no ta un puesto simbolico. E ta clave pa defende interesnan di Aruba den Reino Hulandes, maneho di relacion cu Hulanda, representante diplomatico di Aruba y ta garantisa
continuidad institucional di GevMin. Door di keda sin nombra un GevMin, Aruba ta perde peso y influencia den Reino Hulandes.
Un señal malo pa Aruba
E mocion di AVP no ta solamente un documento parlamentario. E ta un refleho di un Gobierno debilita, fragmenta, cu falta di liderato y comunicacion, na unda poder interno ta mas importante cu responsabilidad colectivo. Si un Gobierno no por papia cu su mes partner di coalicion, con e por papia cu pueblo y goberna pa bienestar di nos Pais? Aruba merece mas seriedad, mas unidad y mas responsabilidad den Gobernacion. AVP FUTURO no por goberna Aruba cu asina asina tanto intriga.
