Den un dushi ambiente di musica di Suriname, Bibloteca Nacional di Aruba ta ricibi un regalo special den forma di un coleccion priva di e escritor sr. Lou Lichtveld, miho conoci como Albert Helman. Conoci pa su bukinan manera, “De Stille Plantage” y “Amor ontdekt Aruba.” E ultimo menciona, ta un buki cu sr. Lou a skirbi riba peticion di sr. Henny Eman (welo) cu tabata tin e deseo pa Helman skirbi “algo apart” riba Aruba. Di e manera aki ta nace e buki “Amor ontdekt Aruba” cu ta haci nos Pais conoci tambe atraves di literatura. E pareha sr. Henri y sra. Ida Does, kendenan tabata amistad di sr. Lou Lichtveld na Aruba, a haya e tarea pa regala e coleccion di buki di Albert Helman na Biblioteca Nacional di Aruba, despues cu e fayece. Un deseo y gesto bunita cu 29 aña despues di Lou su fayecimento na 1996, ta keda cumpli.
E anochi a conta cu discursonan di sra. Astrid Britten directora di Biblioteca Nacional, sr. Henri y sra. Ida Does, sr. Wim Rutgers y Minister President Eman. E coleccion a wordo simbolicamente entrega door di sr. Henri y sra. Ida Does na MinPres Eman, cu a pasa esaki na directora di Biblioteca Nacional sra. Astrid Britten, cu na su turno a entrega esaki na sr. Renwick Heronimo di Departamento Arubiana-Caribiana di Bibloteca Nacional. Parlamentario Xiomara Maduro tabata presente pa gradici sr. Henri y sra. Ida Does, y felicita Biblioteca Nacional pa e bunita regalo. “Tabata un anochi hopi interesante na unda di cada discurso nos por a conoce un tiki mas di sr. Lou Lichtveld como escritor Albert Helman y como un Surnameo cu multiple talento,” Maduro a expresa. Press Release Xiomara Maduro
