Transparencia no ta opcion
Parlamentario Xiomara Maduro a expresa su preocupacion grandi riba e manera cu Minister Gerlien Croes ta sigui nenga di duna claridad riba su biahenan oficial den avion priva, a pesar cu dos instancia oficial di nos Estado di Derecho ya a interveni den e asunto.
Segun Maduro, e caso aki a bay mas leu cu simplemente un peticion pa informacion di parti di Parlamento. Awo tambe e Bezwaaradviescommissie LAR a confirma cu, desde dia 10 di juli 2026, e consehonan riba e bezwaar a wordo entrega na e minister pa e tuma un decision. Segun e carta oficial, e minister tin un plaso di 6 siman pa tuma un decision corespondiente.
Dos instancia oficial ta involucra den e caso aki: Parlamento y e Bezwaaradviescommissie LAR. Sin embargo, e minister ta scoge pa ignora tur dos. “Te awe, pueblo no a mira e recibo di e biahe di trabou den avion priva,” Maduro a declara.
E parlamentario a enfatisa cu e actitud aki ta manda un señal hopi preocupante tocante bon gobernacion. Ora cu un minister ta ignora preguntanan oficial di Parlamento y, na mes momento, ta ignora e proceso legal estableci den e Landsverordening Administratieve Rechtspraak (LAR), e confiansa di pueblo den gobierno ta bira mas debil.
Esaki no ta solamente un falta di respet pa Parlamento, sino tambe pa e proceso legal y pa e institucion cu tin e responsabilidad di controla cu decisionnan administrativo ta sigui ley.
Maduro ta enfatisa cu transparencia no por depende di si un minister kier coopera of no. “Transparencia y responsabilidad no ta opcional; nan ta obligacion. Ora un persona ta ocupa un cargo publico, e tin e deber moral y legal di duna cuenta di su accionnan, di e uzo di recurso di pueblo y di e manera cu e ta eherce su funcion.”
Parlamentario Maduro a conclui cu pueblo a spera un gobierno cu ta lidera cu transparencia y integridad: “Pueblo a spera miho di e lider di FUTURO. Pero te cu awe, loke nos ta mira ta nul komma nul. Mientras e preguntanan legitimo ta keda sin contesta y e prueba di pago di e biahe den avion priva no wordo presenta, e preocupacion riba e falta di transparencia ta sigui crece.”