Algemene Rekenkamer Aruba (ARA) a publica nan investigacion riba Cuenta Anual
2020 y a conclui cu Gobierno a duna yudansa den forma di FASE durante e
pandemia sin cu tabata tin e base legal necesario na momento cu a brinda e
asistencia aki. Parlamentario Xiomara Maduro, kende na e momento ey tabata
Minister di Finansa, ta duna un splicacion.
Debi na e situacion excepcional cu e pandemia a trece cune, Gobierno mester a
actua di biaha cu yudansa di FASE pa asina tur hende por a come. “Tur hende por
compronde cu na e momento eynan no tabata tin e opcion di bay warda pa traha ley
y pa Parlamento aproba e ley di FASE prome cu Pueblo haya yudansa cu e tabata
pidi p’e. Pa evita un situacion penoso na Aruba, mester a actua, y nos a actua
tambe,” Maduro ta enfatisa.
Durante pandemia, Gobierno a brinda yudansa na 12.446 persona cu a keda sin
entrada, cu un suma total di 42,8 miyon florin bou di e programa FASE, pa nan por
cubri nan necesidadnan basico. “Si nos no a actua lihe, awe ainda tur hende lo
tabata lamenta y critica e falta di accion pa yuda Pueblo surpasa e pandemia.
Gobierno a actua cu prudencia y Parlamento a percura pa aproba e Ley di FASE y
legalisa tur pago haci pa yuda Pueblo.
Segun ARA, na e momento ey Gobierno no tabata tin un base legal pa otorga e
yudansa aki. Sinembargo, ARA ta reconoce cu ora cu FASE a wordo introduci,
Aruba su entrada a cay drasticamente, hopi hende tabata tin mester di yudansa
urgente, y e aparato gubernamental mester a sigui funciona cu un minimo di
personal.
“Asina mes, ya caba dia 9 di december 2020, Gobierno a cuminsa cana e caminda
legislativo necesario door di entrega e concepto di Ley di FASE pa su conseho na
Raad van Advies kende 21 di januari 2021 a duna su conseho. Despues a sigui e
trabounan necesario cu a sufri tardansa debi na otro trabounan di mas prioridad den
pandemia. Como cu 2021 tabata un aña di eleccion, esaki a ocasiona mas tardansa.
Na juni 2022 finalmente e Ley di FASE a keda aproba pa Parlamento, y asina tur
yudansa di FASE a keda legalisa.” Parlamentario Xiomara Maduro debidamente ta
responsabilisa e tardansa di e base legal.
Parlamentario Xiomara Maduro: Tur pago di FASE a keda legalisa pa Parlamento na juni 2022
