No tin un decision di Conseho di Minister y miles di ciudadanonan ta expresa nan opinion
Durante e reunion publico di 28 di oktober 2025, tocante e Ley di Reino HOFA, a bira dolorosamente cla cu no tin ningun consenso den Aruba riba e ley aki cu tin un gran impacto.
For di e discusion ta keda cla cu no tin ningun decision di Conseho di Minister di Aruba caminda e conseho ta oficialmente duna su aprobacion pa e Ley di Reino HOFA, ni cu riba base di tal decision a manda un concepto formal pa e Conseho di Minister di Reino na Hulanda. Esaki ta lanta pregunta serio tocante e legitimidad legal y gobernamental di e proceso cu a sigui te awor.
Ademas, e division politico durante e sesion a bira mas cla ainda. E fraccion di MEP y PPA, pero tambe miembro di Staten Mike de Meza (AVP), a expresa abiertamente nan oposicion contra e Ley di Reino HOFA. Varios miembro di Staten di fraccion AVP a bisa cu nan no lo vota te ora cu tin un conseho formal, un señal cla di un division profundo den Parlamento.
Afuera di e Staten tambe e resistencia ta sigui crese. Diestres sindicato a manda un carta conhunto na e gobierno pa expresa cu nan ta contra e Ley di Reino HOFA, pa motibo cu e ta kibra e autonomia di Aruba y ta wordo pusha sin apoyo di pueblo.
Ademas, ta existiun peticion cu caba tin cerca di 10.000 firma di ciudadano Arubiano cu tambe ta contra e ley aki.
E conclusion ta cla: No tin apoyo, no tin consenso y no tin un aprobacion formal di Conseho di Minister di Aruba.
Sinembargo, e gobierno ta parece determina pa sigui cu un Ley di Reino cu ta dividi e pais profundamente.
Press release: MEP