Ora nos ta pega den cosnan bieu, y nos no kier laga los, nos ta persisti den maldad, nos no kier entrega, nos ta sigi coba den bida di hende, nos ta sigi molestia, sigi tira cos na cara, no ta pordona, pero ta sigi husa pasado di hende como ofensa, pa asina halsa nos mes kierendo cu nos ta mihor, anto lamentablemente e momento ey , nos ta duna senjal di amargura y arogancia den nos bida.
Si como mayor bo kier pa bo yiu drecha su bida, ta imposibel pa bo ta lanta zundra tur dia, riba cosnan bieu, ta yega e momento di demostra amor, pasobra amor ta cura herida, amor ta lanta hende bek ta restaura bida di hende, pero si nos ta lanta tur dia treciendo culpabilidad delante, esey ta haci dificil pa coreccon y disiplinaa tuma lugar.
Isaias 43:18-19 ta bisa nos claramente: No recorda e cosnan di antes,ni keda pensa riba cosnan cu a pasa caba. Mira mi ta bay haci algo nobo, awor esaki ta bay sali na cla, boso no ta ripara esey? Lo mi traha un caretera den tera seco, y ruinan den desierto.
Di berdad di berdad, pa nos bida avansa, nos mester pone cosnan bieuw un banda, pasobra no tin ningun clase di gananshi den keda cana cu pensamentonan di rencor y odio, tur locual ta habri herida, di pasado nos mester aparta di dje.Pasobra e enemigo lo keda husa esey constant pa trece tristesa y asina dramatisa nos bida constant, cu ta hiba nos bida atras, y nos salud mental ta wordo ataca.
Dios mes ta bisa pa laga cosnan bieu atras, pasobra Dios sa bon, cu tin cosnan di nos pasado cu ta haci dolor, y cu nos mes no por haci nada contra dje, pesey Dios ta bisa nos pa aparta for di cosnan di pasado.
Hopi biaha nos pasado ta mara den scuridad, nos pasado ta mara den pica di inmoralidad, bruheria,orguyo, arogancia, discriminacion, y den e cosnan ey no tin ningun clase di crecemento.
Diabel ta gusta biba den pasado di hende, pa asina e por wanta hende atras den scuridad y asina e por tin dominio riba mente di hende, pasobra cada biaha cu nos rabia, of nos ta tristu , e diabel ta cohe bentaha den nos bida y pasobra esey ta su plan , pa horta, pa mata, y pa destrui ( Juan 10:10).
Nos tin cu wak bon pa nos cas ta cas di oracion, y no un cas di rabia y odio, pasobra cu heridanan bieuw e enemigo ta haci nos cas un cas di murmurcion. Y murmuracion ta completamente contra e palabra di Dios.
Ta tempo pa nos fiha nos bista riba e bondad nan di Dios, y no riba locual nos a perde den bida, pero tambe pone nos bida riba e bondad di Dios, riba tur locual E a haci pa nos y sigi bay dilanti no wak atras.
Dios sa tur cos, kico E ta permiti den nos bida, tin biaha tin prueba chikito y tin biaha tin prueba grandi y doloroso, pero den tur cos Dios ta duna nos sosten, y nunca Dios ta duna nos un carga mas pisa cu nos por carga. Y tambe Dios ta duna salida for di tur tentacion.
Pakico sigi preocupa , si nos no por cambia ni un cabey riba nos cabes, preocupacion ta haci hende malo, e ta afecta hasta weso di hende, tur locual ta presion halto , por wordo causa door di un simpel preocupacion.