Fraccion di PPA, dirigi pa Otmar Oduber, a trece un di tres peticion pa convoca un reunion publico urgente den Parlamento di Aruba riba e tema crucial di Rijkswet. E peticion, firma y entrega oficialmente dia 30 di januari 2025, ta basa riba articulo 23 di Reglement van Orde di Parlamento di Aruba, cu meta pa Aruba uni den un frente nacional relaciona cu e topico aki. Un frente nacional cu un base solido, caminda diferente gremio hunto cu Gobierno y Parlamento di Aruba ta atende e situacion di Rijkswet segun e principionan di igualdad den Reino Hulandes.
Otmar Oduber ta exigi respet pa e reglamento y pa nos democracia. “Nos a manda e carta 30 di januari 2025. Djey nos a manda e prome recordatorio dia 31 di maart y diaranson 14 di mei, mi a manda e di dos recordatorio. Ta mas di 100 dia a pasa y presidente di Parlamento ainda ta den silencio total, sin cumpli cu su obligacion pa convoca e reunion, segun e regla cla cu ta stipula un plazo di 30 dia,” segun Oduber.
Pa e fraccion di PPA, ta importante pa subraya cu e topico di Rijkswet ta uno di sumo importancia pa e futuro autonomia di Aruba. Na mesun momento nos mester ta bon consciente di e resultado y su impacto di e aumento di interes cu esaki ya caba tin riba nos pais, desde cuminsamento di mei cu esaki a drenta na vigor. Sin laga afor, cu e propio Prome Minister di Aruba ta haya e accion aki di impone un Rijkswet uno anticonstitucional. Y pa completa, Hulanda tabata hopi cla den su posicion cu e ta haya cu Aruba mester atende cu su mesun asuntonan, pero na mes momento kier impone indirectamente y esaki ta bay contra e propio articulo 41 di e Statutonan di Reino Hulandes.
Oduber ta enfatisa: “Nos ta haci un apelacion urgente p’e reunion wordo convoca inmediatamente. Pueblo mester sa kico lo bay pasa. Parlamento mester defende interes nacional y nos no por drenta den fase di silencio peligroso.”
PPA kier haya claridad riba e topico aki y nos pueblo tin derecho na transparencia, dialogo, y un Parlamento cu ta cumpli cu su deber. E fraccion ta keda alerto y lo sigui apela pa haya contesta y accion concreto.