Prome minister evelyn wever-croes ta extende un danki na comunidad di aruba pa demostra nan solidaridad pa cu nos comerciantenan local. Caya g.f. Betico croes tawata yena cu bida durante fin di siman ultimo demostrando asina cu pueblo ta kere y inverti den nos comerciantenan. E ambiente den caya g.f betico croes tawata uno hopi festivo y ameno.
Ta importante si, prome minister ta enfatisa, pa corda cu nos pais ta enfrentando e crisis di covid-19 ainda cu mas di 100 caso activo, y pa e motibo aki pueblo di aruba mester sigui cuida. Gobierno ta pidi comunidad pa no lubida tur loke aruba a pasa aden desde 13 di maart na momento cu a constata e 2 prome casonan. Conhuntamente, aruba a pasa den momentonan hopi dificil na unda gobierno mester a tuma decisionnan drastico pa asina cuida salud di nos hendenan.
Mirando e desaroyo pa cu e casonan activo, gobierno ta flexibilisando e medidanan pa asina duna oportunidad na nos hendenan di por disfruta y sinti e ambiente di e temporada aki. Gobierno ta pidi si cooperacion di tur ciudadano na aruba pa yuda pa por surpasa e di dos ola aki. Ta importante pa cada un di nos cuida y corda riba nos mes, nos famia y aruba en general.
“mi ta gradici cada un di boso pa e sosten duna na nos comerciantenan local y ta spera cu por keda conta riba e sosten aki den futuro. Mi ta sumamente agradeci na e comunidad di aruba pa a demostra cu nan ta kere den aruba su comerciantenan local”, prome minister a expresa.
