Su Altesa Real Prensès Beatrix, Protektora di Dutch Caribbean Nature Alliance (DCNA), a terminá su bishita na Boneiru i Sint Eustatius, kaminda for di 18 te 21 di novèmber 2025 el a bishitá vários inisiativa di naturalesa i komunidat. E bishita a selebrá dedikashon di e islanan na konservashon di naturalesa i inisiativanan di komunidat, ku un enfoke spesial riba restorashon di medio ambiente i proyektonan sosial ku ta konektá hende ku naturalesa den henter Karibe Hulandes.
“E bishita akí a duna nos oportunidat pa destaká importansia di naturalesa den henter Karibe Hulandes i pa tira un bista mas djaserka riba e habitatnan krítiko ku ta sostené nos islanan. El a bin na un momento signifikativo, mirando ku nos a kaba di lansa nos Programa nobo di Habitatnan di mas Importante, ku ta trese tur seis isla hunto pa fortifiká i restorá e ekosistemanan ku nos tur ta dependé di dje,” segun Arno Verhoeven, direktor di DCNA.
Boneiru: konektando hubentut, naturalesa i restorashon ku otro
Prensès Beatrix a kuminsá su bishita na Boneiru ku STINAPA Boneiru den Parke Nashonal Washington Slagbaai, un área salbahe protehá ku mondi di kadushi, salu i terasa di kalichi ku ta duna refugio na algun di e espesienan mas ikóniko di e isla. Su bishita a kai pareu ku Festival di Planta Palu, un evento anual di plantamentu di palu pa mucha di skol básiko pa selebrá nan amor pa naturalesa.
Huntu ku alumnonan lokal, e Prensès a planta un palu, komo símbolo di un kompromiso duradero ku reforestashon i kuido di medio ambiente. Despues ela hasi un rekorido den e parke ku personal di STINAPA pa siña mas tokante su historia i su nifikashon ekológiko, i tokante e trabounan di konservashon i restorashon di naturalesa ku ta andando.
“Tabata un previlegio pa nos yama Su Altesa Real bon biní na Parke Nashonal Washington Slagbaai, un di e símbolonan bibu di STINAPA su kompromiso ku konservashon di e paisahenan i espesienan úniko di Boneiru. Su bishita ta sòru pa atenshon i energia renobá pa nos mishon. E ta rekordá nos ku kada palu ku nos planta, kada mucha ku nos eduká, i kada habitat ku nos protehá, ta kontribuí na konservashon di Boneiru su naturalesa pa e próksimo generashonnan,” segun Melissa van Hoorn, direktor di STINAPA.
Mas lat e tramèrdia ei, Prenses Beatrix a bishitá Tera Barra, e kultivo di mata endémiko di Boneiru, kaminda boluntarionan ta kultivá palu i mata pa proyektonan di reforestashon na henter e isla. Kanando den e greenhouse i e hardin, el a tende kon restorashon di vegetashon endémiko ta kontribuí na almasenamentu di awa dushi, stabilisashon di suela i rekuperashon di biodiversidat na Boneiru.
“Prensès Beatrix su bishita tabata un honor pa nos i el a keda hopi impreshoná ku loke nos a logra ku tur nos boluntarionan durante e añanan tras di lomba. Tabata un plaser i un previlegio pa laga e mira nos trabou i pa dun’é un rekorido den nos sitionan di kultivo i nos hardin endémiko,” segun Tera Barra.
Riba djárason 19 di novèmber, e Prensès a djòin Mangrove Maniacs na kosta sùit di Boneiru pa wak kon nan ta restorá e mondinan di palu di mangel ku ta protehá kosta i ta proveé habitat krítiko pa hopi espesie. Huntu ku e Junior Rangernan di STINAPA el a planta algun palu di mangel kòrá i a papia ku e hóbennan tokante nan eksperensianan ku protekshon di e medio ambiente natural di nan isla.
“Prensès Beatrix su bishita na e áreanan húmedo na e parti sùit di nos isla a nifiká hopi pa nos tim. E palunan di mangel nobo plantá ku el a mira, a saka rais kaba i nan ta hunga un ròl importante den protekshon di nos liña di kosta kontra wer ekstremo i kontra e superfisie di laman ku ta subiendo. Su bishita a sòru pa atenshon bon meresí pa e trabou duru di nos boluntarionan lokal i pa importansia di e palunan di mangel yòn akí pa futuro di nos kosta,” segun Sabine Engel di Mangrove Maniacs.
“E Junior Rangernan di STINAPA ta futuro di Boneiru i protektornan di nos planeta. Kada palu di mangel ku nan planta awe ta fortifiká resiliensia di nos isla pa e próksimo generashonnan. Prensès Beatrix su bishita ta sòru pa mas konsientisashon pa loke ta trata nan esfuersonan, i ta inspirá otronan pa protehá Boneiru su naturalesa pa futuro generashonnan,” segun Allie Constantine, asistente di enseñansa di STINAPA.
E bishita a kontinuá ku un parada na Reef Renewal Foundation Bonaire (RRFB), kaminda e personal a demostrá kon restorashon aktivo di koral ta kontribuí na resiliensia di ref meimei di preshon di klima ku ta oumentando. Prensès Beatrix a bishitá e ofisina i e fasilidatnan di laboratorio di RRFB pa mira e koralnan yòn di nan programa di kultivo i a papia ku e tim tokante kon restorashon ku komunidat ta kondusí, ta krea speransa pa futuro di ref di koral.
“RRFB tabata asina orguyoso di yama Prensès Beatrix bon biní pa mira nos trabou di restorashon di koral djaserka. E bishita akí tabata un oportunidat importante pa nos pone énfasis riba balor di Boneiru su refnan di koral i e ròl krusial ku restorashon aktivo ta hunga pa sigurá nan futuro!”, segun Ernst Noyons, hefe di operashon di RRFB.
Sint Eustatius: reforestashon, espesienan den peliger di ekstinshon i partisipashon di hóben
Riba djabièrnè 21 di novèmber, Prensès Beatrix a bishitá Sint Eustatius, kaminda su programa a enfoká riba reforestashon, biodiversidat i partisipashon di hóben.
El a kuminsá e dia na e sitio di kultivo ReforeStatia, ku Sint Eustatius National Parks Foundation (STENAPA) ta manehá. Akí nan ta kultivá palu i mata endemiko pa restorá e mondinan seku di e isla i pa kombatí eroshon. Terrestrial Rangers a duna e Prensès un rekorido den e sitio di kultivo,
i nan a splika kon espesienan endémiko ta fortifiká resiliensia di klima, stabilisá suela i sostené e founa lokal.
Durante su bishita, Su Altesa Real a risibí tambe un ‘briefing’ tokante protekshon di yuana antiano (iguana delicatissima), un espesie endémiko ku awor ta seriamente den peliger di ekstinshon. Tabata un momentu impreshonante ora den su presensia un miembro di personal di STENAPA a laga un yuana liber den naturalesa, komo símbolo di e esfuersonan kontinuo pa protehá e founa úniko di e isla.
Despues di mèrdia Prensès Beatrix a bishitá Government Guest House, na unda STENAPA a pone énfasis riba importansia di kolaborashon riba tereno di maneho di medio ambiente i e konektividat profundo entre kultura i naturalesa. El a papia ku vários representante tokante e tópiko aki i, huntu ku STENAPA i miembronan di komunidat, el a planta un palu komo símbolo di e laso entre e organisashon i habitantenan di Sint Eustatius.
E bishita a terminá ku apertura ofisial di Kings Well National Parks Center, e sede nobo di STENAPA. E fasilidat moderno akí lo sirbi komo un sentro pa investigashon, konservashon di naturalesa i edukashon, ku un laboratorio marino pa sostené restorashon i monitoreo di koral. Prensès Beatrix a hasi un rekorido den e laboratorio i a papia ku algun Junior Ranger tokante nan eksperensianan i importansia di konservashon di naturalesa pa e futuro generashonnan.
“Nos ta agradesido na Prensès Beatrix pa a habri King’s Well National Parks Center ofisialmente. Su presensia ta aksentuá importansia di e fasilidat nobo akí pa futuro di konservashon di naturalesa na Sint Eustatius i su benefisio pa komunidat, markando un paso importante den fortifikashon di nos kapasidat riba término largu pa maneho di naturalesa,” segun Erik Boman, direktor di STENAPA.
Un aserkamentu regional: e programa di habitatnan di mas importante
E Bishita Real a suprayá e koperashon kresiente di Karibe Hulandes pa loke ta trata konservashon di naturalesa. DCNA resientemente a lansa su Programa di Konservashon di Naturalesa i Restorashon di e Habitatnan di mas importante, un inisiativa riba término largu ku ta uni tur seis isla, esta Aruba, Boneiru, Kòrsou, Saba, Sint Eustatius i Sint Maarten, bou di un strategia konhunto pa protehá i restorá sinku ekosistema krusial: ref di koral, yerba di laman, palu di mangel, mondi tropikal seku i mondi tropikal húmedo.
Bishita di e Prensès ta tira un lus importante riba e trabou ku ta tumando lugá na e islanan i ta mustra sosten evidente pa e hendenan ku ta dediká nan tempu na protekshon di naturalesa. Su presensia ta yuda pa pidi mas atenshon pa e esfuersonan akí i ta enfatisá kon importante e ekosistemanan akí ta pa futuro di Karibe Hulandes.
