E preparashonnan pa tuma e Punto Sentral di Konekshon Marítimo Multidisiplinario Boneiru den uso ta progresando bon. A konstatá esaki durante e konsulta di e partnernan di kadena enbolbí.
Siman pasá Ministerio Públiko BES, Kuerpo Polisial Hulanda Karibense, Wardakosta Área Karibense, Mareshosé Real (Kmar), Duana i Entidat Públiko Boneiru a firma un akuerdo di intenshon pa intensivá e kolaborashon. Na Waf Nello Craane – waf di sùit – ta bini un punto di sosten konhunto, for di kua por ehekutá patruya marítimo, pero tambe operashon di ‘search and rescue’, buska i salba. Aparte di espasio pa mara boto, den bisindario direkto ta ekipá un ofisina. E aspirashon ta pa e aña akí mes tuma e punto sentral di konekshon den uso.
Wardakosta tin un ròl aktivo den MMHB (Multidisciplinaire Maritieme Hub Bonaire – Punto Sentral di Konekshon Marítimo Multidisiplinario Boneiru). Pa e motibu akí e Komandante di Forsa Naval den Region Karibense, general di brigada di marinir Frank Boots tabata presente na e konsulta. Komo direktor di Wardakosta e ta responsabel pa siguridat riba laman i pa protekshon di e fronteranan marítimo den e partinan ultramar di Reino. Na final di e konsulta Boots a invitá gezaghèber Rijna pa un buelo di patruya ku e helikòpter ku Wardakosta ta usa pa patruyá i pa operashonnan di ‘search and rescue, buska i salba.