Diahuebs mainta 20 di maart, Prome Minister Evelyn Wever-Croes a ricibi señor Dennis Burke na su oficina na Bestuurskantoor. Riba e mainta aki, den nomber di Gobierno di Aruba, Prome Minister a duna un reconocemento na señor Burke pa su papel y su empeño den yuda empodera hende muhe- y mucha muhenan na Aruba.
Señor Burke ta encarga cu Centro di Bario Playa Pabou y pa hopi aña incluyendo e aña aki ta organisa na ocasion di Dia Internacional di Hende Muhe, encuentronan pa yuda empodera e hende muhe.
Prome Minister ta expresa cu e echo aki ta algo cu su persona ta admira y respeta enormemente di señor Burke. Señor Burke tin un pasion y determinacion grandi pa yuda y sigui yuda hende muhe- y mucha muhenan na Aruba y pa su dedicacion y trabou incansabel cu e ta bin ta haciendo pa hopi aña riba e tereno aki, Prome Minister, den nomber di Gobierno di Aruba a dun’e un merecido reconocemento.
Prome Minister:
“E trabou cu señor Burke ta haci, no ta solamente empodera e hende muhe na Aruba, sino a traves di esaki e ta marca e cambio riba e tereno aki na mundo. Cu señor Burke por sigui haci e trabou bunita y importante aki pa hopi tempo mas y cu Dios bendicion’e. Danki den nomber di Gobierno di Aruba y henter pueblo di Aruba”, Prome Minister a expresa.
