CuracaoFeaturedInternacional

Prosperidat amplio komo marko konseptual pa implementashon di pakete di pais Kòrsou’

Ser

Tema prinsipal di enkuentro introduktorio ku presidente nobo di SER Hulanda

Un delegashon tékniko di Konseho Sosial Ekonómiko (SER) di Kòrsou, huntu ku koleganan di e SER-nan di Aruba i Sint Maarten, a partisipá resientemente na un bishita di trabou importante na SER di Hulanda na Den Haag, kaminda nan a sera konosí di forma ofisial ku e presidente nobo di SER di Hulanda prof. dr. Kim Putters, ku a asumí e kargo aki aña pasá.

E almuerso di introdukshon ku sr. Putters a konsentrá su mes pa un gran parti riba e enfoke amplio di prosperidat (brede welvaart) komo posibel kuadro konseptual pa ku diseño i aplikashon di e medidanan di reformá inkluí den e tres paketenan di pais ku e paisnan Karibense di Reino a akordá ku Hulanda na 2020. Konsiderando ku SER di Hulanda tin eksperensia den uso di e enfoke di prosperidat amplio komo marko konseptual, a kompartí ideanan balioso i bon práktika ku e delegashonnan di e konsehonan konsultivo sosioekonómiko di e tres paisnan Karibense den Reino.

Prosperidat amplio ta enserá un aserkamentu integral kaminda ta tene debido kuenta, banda di kresementu ekonómiko, ku aspektonan importante manera sostenibilidat, koheshon sosial i inklushon.

Prof. dr. Kim Putters, ademas di ta e presidente nobo di SER di Hulanda, a ser nombrá dia 16 di sèptèmber di aña pasá komo katedrátiko di ‘Prosperidat Amplio’ na Universidat di Tilburg. Por lo tantu, e bishita di trabou a brinda un oportunidat úniko pa interkambiá opinionnan kuné riba viabilidat i faktibilidat pa realisá e temanan di e pakete di pais di Kòrsou (Landspakket Curaçao) for di un perspektiva di prosperidat amplio. Konsekuentemente, durante e almuerso introduktorio a hiba un interkambio ekstenso riba e tema kaminda sr. Putters a mustrá interes den un posibel aplikashon di e enfoke di bienestar amplio den konteksto di e tres paisnan Karibense. E presidente di SER di Hulanda a suprayá, den términonan general, e importansia di e enfoke integral aki i tambe a asentuá importansia di su implikashonnan pa ku formulashon di maneho públiko ku partisipashon di tur aktor envolví.

E delegashon tékniko di SER di Kòrsou a demostrá su satisfakshon ku e debatenan riba nivel haltu i e interkambionan di konosementu i eksperensianan durante e bishita introduktorio. Direktor i sekretario general di SER di Kòrsou drs. Raul Henriquez a rekonosé e potensial di e enfoke amplio di prosperidat pa promové desaroyo sostenibel i bienestar general pa Kòrsou. E la indiká ku SER di Kòrsou lo sigui kooperá di forma konstruktivo ku SER di Hulanda pa wak kon i di ki forma por apliká efikasmente e enfoke aki den kuadro di e akuerdo mutuo di kooperashon pa ku e reformanan, manera firmá dia 4 di aprel último dor di Sekretario di Estado enkargá ku Asuntunan di Reino sra. Alexandra van Huffelen i e promé ministernan di Aruba, Kòrsou i Sint Maarten.

Komo tal e delegashon di SER di Kòrsou a ekstendé di forma ofisial un invitashon por eskrito na sr. Putters pa e realisá un bishita di trabou na e isla den e di dos parti di 2023 kaminda e lo ta invitado di honor durante un evento spesial den kua lo sigui elaborá riba e tema di prosperidat amplio den kuadro di e pakete di pais Kòrsou. E evento aki lo brinda un oportunidat ekselente pa sigui debatí mas amplio riba aplikashon di e enfoke aki den konteksto di Kòrsou.

Sigun sr. Henríquez, e bishita di trabou a reforsá mas e lasonan entre ámbos órganonan di konsulta i a duna lugá pa un interkambio fruktífero di ideanan i perspektivanan. ,,SER di Kòrsou ta komprometé su mes pa sigui promové desaroyo sostenibel i bienestar pa Kòrsou i lo konsentrá su mes spesífikamente riba kon ta trata ku e temanan di reforma di pakete di pais for di e enfoke di prosperidat amplio.”

Banda di SER di Hulanda, a realisá bishitanan di trabou na e siguiente instansianan Hulandes: Konseho di Migrashon, Ofisina di Planifikashon Sosio Kultural (SCP), Ofisina di Planifikashon Medioambiental (PLB), Ofisina Sentral di Statistik (CBS), Ministerio di Asuntunan Sosial i di Bienestar (SWZ), Ministerio di Asuntunan Eksterior (BUZA), Ministerio di Asuntunan Interior i di Relashonnan den Reino (BZK) i SER Brabant/Brabant Advies. Na e entidatnan aki tambe a debatí den ekstenso riba e potensial di e enfoke di bienestar komo kuadro a base di kua por aserká e reformanan den e pakete di pais i a base di kua tambe por midi nan efektividat. Importante tabata e interkambio fruktífero ku e delegashon tékniko di SER di Kòrsou tabata tin ku e Direktor di Relashonnan den Reino (ku riba nivel tékniko na Ministerio di BZK ta responsabel pa e paisnan Karibense di Reino) sra. mr. drs. Saskia de Reuver.

Related posts

Minister Endy Croes a duna Informacion di su Vision y Maneho pa cu enseñansa na studiantenan di IPA y di Hulanda

EA News Author

Parlamentario Benny Sevinger: “Arubiano a bira ciudadano di segunda categoria den su propio pais”

EA News Author

TUI Care Foundation i Green Phenix ta lansa projekto pa ‘upcycle’ sushi na Kòrsou.

EA News Author

Leave a Comment

Whatsapp Message