MINISTER GERLIEN CROES TA GAÑA ATROBE!
Renobacion Arubahuis tin 3 aña andando caba
Cu asombro MEP a tuma nota di expresionnan di Minister Gerlien Croes, cu e ta emociona cu “su” proyecto pa renobacion di Arubahuis. Mas grandi e asombro tabata ora nos a tuma nota di expresionnan di e Minister, cu MEP a neglisha e edificio di Arubahuis. Sin pensa mes, con cu e acusacionnan falso aki, e ta cuestiona su propio colega Geoffrey Wever, cu tabata forma parti di Ministerraad anterior, y tabata completamente na altura di e proyecto.
Un biaha mas nos ta gara Minister Gerlien Croes ta gaña. Y ata aki e pruebanan.
Desde cu Gabinete Wever-Croes a tuma over di AVP – e partido di cual Minister Gerlien Croes tabata forma parti di dj’e e tempo ey – a encontra un edificio di Arubahuis totalmente neglisha. E edificio a hasta wordo afgekeurd, cual ta hopi tristo, pasobra e edificio di Arubahuis tin un balor grandi pa henter e pueblo di Aruba. Pa e motibo aki gobierno di MEP a aproba pa e personal muda temporalmente pa un otro edificio, mientras ta cuminsa traha un proyecto y aloca fondo pa renoba e edificio. No mester lubida cu na aña 2017, a encontra tambe un pais na borde di bancarota, y mester a cuminsa cu saca Aruba di e crisis financiero cu partido AVP a laga nos pais den dj’e.
Gabinete Wever-Croes a cuminsa cu e “projectbeschrijving” y pa aplica pa e permisonan necesario, mirando cu ta trata di un monumento. A cuminsa cu aloca 1 miyon florin pa paga un architecto na Hulanda pa prepara y guia e proyecto. Despues a presupuesta e inversion mes di 11.1 miyon florin. Pa logra esaki tabata un caminda largo di inscribi proyecto pa inversion, y un proceso di evaluacion pisa. Asina Gabinete Wever-Croes a logra cu e proyecto aki a bai den e lista di inversion, aproba pa Minister di finansas Xiomara Maduro y Minister di Economia Geoffrey Wever. Mitar di e 11.1 miyon a wordo aloca na 2024 y e resto tabata den presupuesto 2025.
Esaki ta un muestra cu claramente e proyecto aki ta un proyecto cu Gabinete Wever-Croes a prepara, y a aloca fondo p’e den 2024 y den 2025. E proyecto aki pa renoba Arubahuis a cuminsa durante gobernacion di Gabinete Wever-Croes. E unico cos cu Minister Gerlien Croes mester a haci, ta percura cu e proyecto wordo finalisa.
Riba su mes, MEP ta contento di mira cu e minister ta continua cu e proyecto di Gabinete Wever-Croes. Pesey, den prome instante, ora e minister a reacciona asina emociona, MEP no a reacciona, pasobra simplemente ta bunita pa mira ora tin continuacion di e proyectonan di MEP, pasobra e ta un reconocemento di un bon trabou di Gabinete Wever-Croes. Cu e no a duna reconocemento na Gabinete Wever-Croes pa tur e trabou haci, pa e pronkia cu pluma di otro, ta menos mal y ta bisa mas di dj’e cu di MEP.
Pero na momento cu el’a expresa cu MEP a laga Arubahuis bandona y neglisha, esey si no ta corecto. Pesey, cu prueba den man, un biaha mas MEP mester mustra cu Minister Gerlien Croes ta gaña un biaha mas.
