Politica

Rocco Tjon: Prome Minister Evelyn Wever-Croes lo sigui baha gasto di Gobierno na 2020


ORANJESTAD,Aruba

Na 2019 pa prome biaha, bou liderazgo di sra. Evelyn Wever Croes, a traha atraves di un plan structura pa baha gasto di Gobierno. E metanan principal pa logra esaki, manera por lesa bek den e resumen anual di e Ministerio di Asuntonan General, tawata entre otro pa (1) controla nombracion den aparato gubernamental (2) Baha cantidad di persona cu ta “non-actief”. 

CONTROLA NOMBRACION DEN APARATO GUBERNAMENTAL

Conforme e plan di maneho pa reduci e gastonan (Beleidsplan Verlaging Personeelskosten) di personal na 2019 a presupuesta solamente 7.5 miyon florin pa yena vacatura. A resulta cu Gabinete Wever-Croes a logra e meta aki tambe y a keda dentro di e margennan. 

Ta importante pa enfatiza cu e 7.5 miyon florin aki a wordo husa concretamente pa yena en total 35 vacatura na, Cuerpo Policial Arubano, Brandweer Aruba y Arumil. Pues kinan no ta trata di personal na un bureau di Minister. Pasobra manera nos por lesa den e mesun resumen anual gasto di personal na bureau di sra. Evelyn Wever-Croes ta 8.8 miyon florin menos cu tempo di Mike Eman. Sra. Evelyn Wever-Croes ta maneha su Ministerio cu solamente 21 persona y esaki ta 126 persona menos cu Mike Eman tawata husa pa maneha e mesun Ministerio. 

BAHA CANTIDAD DI PERSONA CU TA “NON-ACTIEF”

Un problema grandi cu gobierno mester a atende cune ta empleadonan cu ta cobra un salario pero ta “non-actief”, pues no ta traha. Esaki por tin diferente motibo, pero realidad ta cu e ta “pisa” riba presupuesto y pues ta afecta e maneho. Na aña 2019 a logra baha e grupo di “non-actief” for di 70 persona te cu 23.

Esaki obviamente no tawata posibel sin esfuerzo di entre otro departamento di recurso humano y e diferente departamentonan gubernamental caminda a ubica e personanan aki. Pues enbes di emplea personanan nobo sra. Evelyn Wever-Croes a atende cu un problema cu Mike Eman a neglisha, y asina structuralmente ta haci e aparato gubernamental mas eficiente. Pero mes of mas importante ta cu e empleadonan aki, cu pa un motibo of otro tawata na cas y kier a contribui awor por haci esaki y asina ta di balor agrega. 

MANEHO PA 2020

sra. Evelyn Wever-Croes, den su resumen anual di 2019 a anuncia caba cu na 2020 e lo sigui e mesun rumbo aki. Specificamente lo enfoca riba maneho pa atende cu e fenomeno di “meld ziek” y sigui haci e grupo di “non-actief” mas chikito. Tambe lo bin cu un buelta mas pa ambtenaarnan por aplica pa VUT y lo introduci den colaboracion cu APFA e posibilidad pa ambtenaarnan por bay cu penshun mas trempan. 

E maneho di nos Prome Minister, sra. Evelyn Wever-Croes sigur por conta cu sosten di nos fraccion (MEP) pasobra nos ta wak pasonan concreto y significante pa mehora e servicio di e aparato gubernamental y hisa su eficiencia. Y na mes momento bahando gasto na e ministerionan. Tur esaki a resulta cu sra. Evelyn Wever-Croes a sera presupuesto 2019 cu un un deficit di solamente 4 miyon florin.

Related posts

Plataforma Hobennan Profesional: Tienda di Ley ta bek!

EA News Author

Minister Dangui Oduber: Representantenan di DVG a atende reunion di Carpha den nomber di gobierno na Jamaica

EA News Author

AVP a reuni cu AHATA, ATIA y ATA riba futuro desaroyo pa saca e pais dilanti

EA News Author

Leave a Comment