Lider di fraccion di FUTURO, Ruthlyn Lindor, a expresa satisfaccion cu e reunion di informacion cu sindicatonan di Aruba a tuma luga recientemente den Parlamento di Aruba tocante e proposicion di Rijkswet HOFA. SegunLindor, e reunion a permiti parlamentario nan haña un miho comprension di e punto di bista di sindicatonan y di e posibel efectonan di e ley pa Aruba.
Lindor a indica cu e reunion tabata enfoca riba intercambio di pensamento riba e contenido di e Rijkswet HOFA. “E reunion a bay bon y a sirbi como un oportunidad pa sinti kico ta perspectiva di sindicatonan y unda nan preocupacionnan principal ta,” el a declara.
Segun Lindor, sindicatonan mes a mustra claramente cu nan no ta concentra riba pasado, sino riba e situacion actual di Aruba y riba medidanan cu por wordo tuma den e momento presente pa enfrenta e reto nan economico.
Parlamentario Lindor tambe a referi na loke por a describi como un “mal percepcion” den sociedad, unda algun hende ta kere cu Aruba a wordo forsa pa firma e acuerdo. Segun Lindor, Aruba no a wordo obliga pa firma e documento. El a splica cu e Rijkswet anteriormente a wordo kita for di mesa, pero durante e proceso a wordo dicidi pa inclui e debenan internacional den e marco legal.
El a agrega cu den october 2023, ex prome minister Evelyn Wever-Croes a considera e acuerdo como algo positivo pa Aruba. Posteriormente, riba 24 di juni 2024, el a bolbe bin na mesa pa firma, debi na e cantidad di beneficio cu, segun Lindor, e ley por aporta pa pais.
Preocupacion riba carga financiero y condicionnan den LAFT
Lindor a subraya cu actualmente Aruba ta opera bou di un Loan Agreement for Financial Transactions (LAFT) cu ta implica un porcentahe di interes halto pa paga e debe relaciona cu pandemia di COVID-19. El a afirma cu Hulanda a pone un tasa di interes hopi halto pa Aruba.
Segun e lider di fraccion, Aruba actualmente ta pagando interes riba e debe cu un tasa di aproximadamente 6.9 porshento. El tambe a indica cu den e LAFT tin varios momento – segun Lindor , siete en total , den cual Hulanda por determina cu Aruba no ta cumpli cu condicionnan, y consequentemente por hala atras e acuerdo.
Ademas, Lindor a expresa preocupacion cu e acuerdo tambe establece cu si Aruba logra un surplus financiero, e pais no lo por uza e fondo ey libremente pa inverti den desaroyo di comunidad y bienestar di pueblo.
Lindor a conclui cu dialogo continuo cu sector sindical y otro stakeholder nan ta esencial pa sigura cu decisionnan cu ta wordo tuma riba nivel nacional ta basa riba informacion completo y riba interes di pueblo di Aruba.