Sra. Sjeidy Dijkhoff- Feliciana A.T.A: Mas y mas e turista ta busca e aspecto autentico di Aruba

Representante di A.T.A den e proyecto di Tourism Product Enhancement Fund (TPEF) Sra. Sjeidy Dijkhoff- Feliciana tabata presente na e conferencia di prensa na Museo Arqueologico Nacional Aruba y ta duna di conoce cu ta un dia hopi importante pa cultura di Aruba. E edificio di Museo Arqueologico Nacional Aruba ta uno hopi bunita y cu hopi balor pa nos tur cu ta biba na Aruba y cu ta yama nos mes Arubiano. 

E edificio di Museo Arqueologico Nacional Aruba no ta solamente conta ta ken nos ta y di unda nos ta bin, pero tambe e tin su balor pa nos bishitantenan. Segun Sra. Sjeidy Dijkhoff -Feliciana A.T.A no tin un alocacion mas perfecto cu ta den centro di nos ciudad pa por atrae nos turismo. Sinembargo  Museo Arqueologico Nacional Aruba semper a conta cu TPEF cu diferente proyectonan den e ultimo añanan cu mester a wordo uza pa renoba y embeyece e edificio. 

Tourism Product Enhancement Fund (TPEF) ta enfoca den proyectonan di embeyecemento di producto turistico riba diferente area cu ta e parti di medio ambiente pero tambe den cultura. Pesey mes awe a toca parti di cultura unda cu lo pone un bunita galeria di arte den e edificio di Museo Arqueologico Nacional Aruba.

Mas y mas e turista ta busca e aspecto autentico di e pais cu nan ta bishita pa asina siña y aprecia e historia y cultura di e pais. Aruba tin hopi historia pa conta y hustamente esaki Museo Arqueologico Nacional Aruba y TPEF ta boga pe. 

E experencianan intangibel y e manera con Aruba ta conta su historia ta e recuerdonan cu ta nos turistanan sigur ta bay cas cu ne. Segun Sra. Sjeidy Dijkhoff Feliciana di ATA, e bunita proyecto aki cu ta enfocando riba arte moderno y contemporaneo lo contribui tambe na e artistanan y parti di e industria creativo unda cu ta trece hopi beneficio no solamente pa nos hendenan local pero tambe pa nos turistanan. 

Den nomber di hunta di TPEF ta gradici tur esunnan cu ta forma parti di e bunita proyecto aki, pero tambe pa tur esunnan cu ta traha di dia aden y dia afo pa haci tipo di proyectonan asina aki posibel. Na Aruba nos mester di mas di tipo di proyecto asina y e turista ta spera esaki di nos mirando cu e parti autentico sigur ta bin dilanti mas y mas den hopi di e estudionan cu ta wordo haci riba e area aki.