Victory I lo ansa 95 camarote y acomodacion pa te cu 190 huesped durante Statia Week.
Cu e demanda pa acomodacion subiendo drasticamente prome cu e conmemoracion historico di “First Salute 250” riba e isla, Gobierno di Statia a sigura e barco Victory I, cu tin 95 camarote, pa sirbi como un hotel flotante. Esaki lo crea espacio pa te cu 190 huesped adicional durante e siman di Statia Week.
Victory I lo ta disponibel di 10 te cu 17 di november 2026, cubriendo tanto Statia Week como Statia Day riba 16 di november. E capacidad adicional aki lo duna mas Statiano cu ta biba den exterior, miembro di e diaspora y bishitante internacional e oportunidad di ta presente na Statia pa e di 250 aniversario di e First Salute.
E hotel flotante aki ta forma parti di e preparacionnan pa responde na e demanda excepcional pa acomodacion durante e periodo conmemorativo, manteniendo Statia como e centro di e experiencia pa e bishitantenan. E iniciativa aki a wordo encamina bao direccion di Comisario di Isla, Rechelline Leerdam, kende su cartera ta inclui turismo, cultura y asuntonan di haf.
“First Salute 250 ta pertenece na Statia y su hendenan, y nos kier pa e cantidad di mas grandi di persona cu ta sinti un conexion cu e isla aki y su historia haya e oportunidad di ta akinan,” Comisario Leerdam a declara. “E yegada di Victory I ta duna nos capacidad adicional durante un siman extraordinario pa Statia y ta percura cu mas bishitante por bibá e momento historico aki net caminda cu el a sosode.”
E hotel flotante ta un suplemento pa e hotelnan, cas di huesped, casnan di vakantie y otro proveedornan di acomodacion existente na Statia. E meta ta pa cumpli cu e demanda extra durante e periodo conmemorativo, filando pareu pa e bishitantenan explora e isla, participa den e actividadnan di Statia Week y apoya e restaurantnan, comerciantenan y atraccionnan local.
Huespednan cu ta keda abordo di Victory I lo ta cerca di e programa di e siman y e lugarnan central den historia di Statia, incluyendo Fort Oranje y Oranjestad. E barco lo opera primordialmente for di Statia durante e periodo di conmemoracion y lo haci un bishita di un dia programa pa San Martin riba 11 di november pa busca huesped adicional, prome cu e bay bek Statia e mesun anochi ey.
Riba 16 di november 1776, Fort Oranje a contesta e saludo di e brik Americano Andrew Doria. E intercambio aki a bira conoci como e “First Salute” y ta wordo ampliamente considera como e prome reconocemento formal door di un autoridad extrangero di e bandera di e Merca recien independiente. Exactamente 250 aña despues, Statia lo conmemora e acontecimento historico aki cu un siman di actividadnan celebrando historia, cultura, hendenan y e conexionnan internacional di e isla.
Gobierno di Statia ta expresa su gratitud na Landry & Kling y Victory Cruise Lines pa nan cooperacion den e desaroyo di e arreglo pa e hotel flotante aki. Tambe ta extende un danki na e Conseho Ehecutivo, Conseho Insular, Ministerio di Asuntonan Interior y Relacionnan di Reino, e ekipo di haf, departamento di gobierno, socionan priva y tur otro cu a contribui pa haci e iniciativa aki un realidad.
Un estadia di siete anochi abordo di Victory I lo wordo ofreci di 10 te cu 17 di november 2026, cu paquetenan pa e siman completo cuminsando na USD 2.750 pa kamber pa un maximo di dos huesped. Impuesto di turismo, gastonan di reservacion y tarifa di procesamiento di pago aplicabel lo ta adicional.
