Bonaire Internacional

Ta prohibí pa tene fiesta na Te Amo Bich


No ta permití pa tene fiesta na Te Amo Bich i otro bichnan ku grupo grandi di hende. Último tempu parti anochi i den mardugá gruponan grandi di hende ta bini huntu na Te Amo Bich i na otro sitionan. Esaki no ta pèrmití pa motibu di chèns di plamamentu di Covid-19. Aktualmente mas ku 25 persona no mag bini huntu na enkuentronan privá. Esaki ta konta tambe pa fiesta na bich. No ta pèrmití pa kanta i balia tampoko. 

Gezaghèber, fiskal mayó i hefe di kuerpo polisial, ku huntu ta forma ‘triángulo’, ta hasi un yamada riba tur baidó di fiesta pa asumí nan responsabilidat i no bai bich òf otro sitio masalmente i ku ekipo di sonido despues di ora di siere di hóreka. Den tempu binidero ta kontrolá si e molèster akí ta kontinuá. Si e molèster kontinuá i gruponan grandi sigui bini huntu, e ora ei ta hasi uso di Kuerpo Polisial Hulanda Karibense, KMAR, Ministerio Públiko i Entidat Públiko Boneiru pa tuma medida, manera duna but. Den kaso di molèster serio por detené baidó di fiesta. Por konfiská reibeweis, vehíkulo i ekipo di sonido. Si ta realmente nesesario por sera sierto bichnan i áreanan.

Aglomerashon di muchu hopi hende i músika duru for di spiker i asta televishon ta okashoná hopi molèster, kaminda asta habitantenan di Belnem tin molèster di esaki. Banda di esei ta surgi situashonnan insigur debí na hopi tráfiko ku ta bai bich, kaminda masalmente ta stashoná outo. E siguiente dia Selibon ta traha oranan largu pa deshasí di e shushi ku hendenan ta laga atras. Tin indikashon tambe ku tin kriminalidat serio ta tuma lugá. Tin kestion di benta i/òf uso di droga (harddrugs) i asta di atrako kaminda ta kita telefòn selular bou di menasa di arma. Tambe nos animalnan ta kore peliger pa motibu di e molèster akí. Ta stroba e nèshinan di turtuga i e sitionan di brui di flamingo  i por dal buriku ku outo.

Tur hende ke lo mihó pa tur hende i bestia na Boneiru. Pa e motibu akí ‘triángulo’ ta sali for di e punto di bista ku tur hende tin ku realisá ku okashoná molèster sigur no ta komportashon responsabel. Si tur hende tene nan mes na regla, no tin mester di tuma medida severo.

Related posts

Bahamas a sera frontera cu Merca y tin casonan alarmante pa dia di COVID19

EA News Author

Belastingdienst ta bishitá kompanianan pa kòntròl di ‘loonheffing’

EA News Author

Den Sala di conseho insular a trata relato finansiero di Boneiro

EA News Author

Leave a Comment