Dia 31 di ougùstùs 2024 for di 19.00 or te 21.00 or un grupo di 8 eskritor
lokal ta duna un presentashon di ‘spoken word’ tokante felisidat na Parke Isidel. Den luna
di ougùstùs e eskritornan a sigui 4 tayer di ‘spoken word’ serka Esther i Linda de Veer di
Fundashon di Kurason. Durante e tayer e eskritornan lokal a siña entre otro kon pa kapta i
mantené e públiko su atenshon. E poeta Gershwin Bonevacia ta bin Boneiru komo artista
invitá spesialmente pa e presentashon. Fundashon di Kurason ta organisá e anochi di
‘spoken word’ riba enkargo di Biblioteka Públiko Boneiru.
Den kaso di ‘spoken word’ ta trata di resitashon di loke un hende a skirbi. Por ta trata di un
poesia òf un kuenta. Tin ora nan ta hasi uso di sierto gestonan durante e resitashon, otro
hende ta skohe pa makiá nan kara spesialmente pa e presentashon. Sa sosodé tambe ku
nan ta resitá e kuenta òf poesia den estilo di rap/hiphop.
Gershwin Bonevacia (1992) ta poeta, artista di ‘spoken word’ i kreadó di teater. Gobièrnu
munisipal di Amsterdam a nombra Bonevacia komo poeta di e siudat akí pa e periodo di
2019 pa 2022. E poeta ta disléktiko, pero esaki nunka no a strob’é di laga su bos poétiko
resoná. Na aña 2017 Bonevacia a publiká e tomo di poesia ‘Ik heb een fiets gekocht – Mi
a kumpra un baiskel’, na aña 2021 el a publiká e tomo ‘Toen ik klein was, was ik niet bang
– Tempu ku mi tabata chikitu, mi no tabatin miedu’ (2021). Na aña 2023 el a haña hopi
elogio pa su obra di teater ‘Terug naar Prinsenplein – Regreso na Prinsenplein’.
E evento di 31 di ougùstùs ta forma parti di un seri di 4 presentashon di ‘spoken word’.
Jennifer Pocornie-Martis, hefe di biblioteka públiko ta kontentu ku e kolaborashon ku
Fundashon di Kurason. “Nos ta spera ku tur hende por disfrutá di e artistanan ku a
prepará nan mes ku alma i kurason. Nan ta resitá na entre otro hulandes i papiamentu. E
anochi ta kuadra kompletamente ku nos vishon pa biblioteka. Un biblioteka ku ke inspirá
nos komunidat pa skirbi i ser kreativo.”
Por registrá pa e evento na : eventsbibliotekapubliko@bonairegov.com òf manda app pa
7706302.
