Votacion ultimo pa directiva nobo ta e simbolo di un campaña sushi y cu promesanan priminti no realistico. Un eleccion controversial, a finalisa den un forma cu resto di pueblo no a spera. Ta papia aki di e famoso reunion pa
wordo gana pa Radolf Lacle y su grupito.
Pero manera e dicho ta bisa “e pueblo ta haya e gobierno cu e merece”, esey ta nifica cu si el a vota p’e mesun cosnan cu tabata wordo critica grandemente, e lo mester sigui soporta esaki. Y esaki ta e sfeer cu a biba di diferente clubnan cu si kier un cambio.
Pero e gran pregunta ta: E clubnan a consulta cu nan miembronan prome cu e votacion, despues di tur e criticanan ricibi. E tactica bieu y wega sushi di semper cu Randolf Lacle a haci y a keda di haci ta keda influencia di e clubnan cu menos caracter.
Loke si por bisa ta cu tabatin un campaña grandi andando bou di e clubnan chikito di menos recurso, promesa pa ayudo di tur sorto di forma, hasta cu instalacion di turf. Y si mira e votacion bon, ta e clubnan cu ta bon para a vota pa e cambio mientras cu esnan chikito cu ta den e diferente otro divisionnan a vota pa sigui cu e maneho tradicional, casi igual na e sistema di vota politicamente na Aruba.
Mayoria di e clubnan di futbol ta chikito y no ta den division honor. Nan no ta mira e avancenan pa nan y tin soño cu e cambionan priminti un dia lo yega cerca nan. Pa por a haya apoyo di e clubnan aki, mester a hiba un campaña diferente, no solamente di reunionnan informativo.
Tin hopi cos cu ta sosode den e organisacion aki cu hopi hende ta keha di nan den combersacionnan na club, pero no ta demostra e agaya pa trece esaki dilanti. Tin duda den e maneho financiero, pero e clubnan (den su mayoria) no ta tribi di pidi cuenta. Di kico realmente nan tin miedo? Ta parce cu AVB ta secuestra u den profundidad di mas sorpresa cu ta pensa kisas ?
Tin cosnan dudoso cu ta sosode, pero no ta trece esaki dilanti na momento cu tur e clubnan ta hunto. Mientras cu no tin e curashi pa bini dilanti y pidi cuenta, of apoya esnan cu ta pidi cuenta, nada lo cambia. Esun cu no a haci nada malo no mester tin miedo pa un investigacion. Y esaki ta loke cu no ta sosode. Banda di tur cos Aruba ta un pais democratico e un eleccion a tuma luga y tin un resultado y esaki ta loke cu mester respeta y ta felicita e team nobo , pero lo tin wowo skerpi riba tur movecion di AVB.