Tourism Corporation Bonaire (TCB) den kolaborashon ku Bonaire International Airport (BIA), Bonaire Hotel and Tourism Association (BONHATA) i e kapitan di haf di Entidat Públiko Boneiru, dia 3 di aprel 2025 a organisá e promé Bonaire Tourism Update di kada tres luna pa aña 2025 den Delfins Beach Resort.
Elesiër Angel, direktor statutario interino di TCB, a presentá e resultadonan preliminar for di kua a resultá ku den aña 2024 Boneiru a yama bon biní na 182.181 bishitante, kompará ku 169.706 na aña 2023 i 157.000 na aña 2022, i ku esaki e meta pa aña 2024 a keda eksitosamente lográ. Elesiër a pone énfasis riba e sinku Indikadónan Krítiko di Prestashon (KPI’s) i e áreanan mas importante di atenshon. Un bista general di e aktividatnan di merkadeo den e promé kuartal ta aksentuá e partisipashon na e bolsanan grandi na Oropa i Nortamérika, entre otro Vakantie Expo, DuikVaker, IMM, New York Travel & Adventure Show, Toronto Outdoor Adventure Show i Routes Americas. Banda di esaki a tira un bista riba e esfuersonan riba tereno di relashonnan públiko den ámbos region. Mirando padilanti por bisa ku e inisiativanan ku ta na kaminda ta enserá un kampaña di merkadeo ku JetBlue, bishitanan di prensa planiá pa e luna akí i partisipashon na Seatrade, e kampaña di Rediscover Bonaire, Taste of Bonaire i TCB & Friends durante Dia di Rincon.
“Tabata un plaser pa bini den kontakto ku nos stakeholdernan i partnernan di medionan di komunikashon durante nos promé aktualisashon di kada tres luna tokante turismo. Diálogo habrí i invershon kontinuo ta di importansia krusial si nos ke realisá kresementu na un manera ku ta benefisiá Boneiru i su habitantenan”, segun Elesiër Angel, direktor statutario interino di Tourism Corporation Bonaire.
“Ku un grado di okupashon di 83%, un tarifa promedio pa dia (ADR) di $ 298 i un RevPar (entrada pa kada kamber disponibel) ku a subi ku 35% kompará ku aña pasá, e promé kuartal di aña 2025 ta konfirmá ku tin hopi demanda pa Boneiru. Nos por bisa libremente ku e sifranan aki ta relashoná direktamente ku e oumento den konekshon aéreo ku nos a mira for di luna di novèmber, ku binida di JetBlue i Corendon i e buelonan èkstra di American Airlines. Esaki ta proba ku ora e aksesibilidat bira mihó, e prestashonnan ta sigui. Pero sin e invershonnan korekto den konekshon aéreo, merkadeo i desaroyo di e destinashon, nos ta kore riesgo di pèrdè e ‘momentum’, i mas importante ainda, nos ta pèrdè e oportunidat pa atraé e tipo di bishitante ku Boneiru berdaderamente ta deseá. Mundu ta en buska di naturalesa, kultura i outentisidat – nos tin esakinan. Awor nos tin ku sòru pa nan por haña i alkansá nos”, segun Veroesjka de Windt, direktor di BONHATA.
“E promé kuartal di e aña akí a sòru pa un bon meskla di barku, ku a varia di barku krusero tradishonal, manera Carnival, te barkunan ultraluhoso i barkunan aventurero. Banda di esaki nos tabatin un skema sumamente ekilibrá den nos haf, loke ta suprayá nos esfuersonan pa manehá nos aktividatnan turístiko”, segun Günther Flanegin, kapitan di haf.
Maarten van der Scheer, direktor di BIA, a ripará un oumento konsiderabel di tráfiko internashonal, prinsipalmente impulsá pa American Airlines, Corendon i JetBlue. Tabatin un desaroyo stabil entre e islanan, ku mas buelo di Zair. Mas aleu, proyektonan importante ta enserá renobashon kompleto di e sistema di iluminashon di aeropuerto, un kontrato firmá pa aktualisashon di e punto di kontròl di siguridat, aktualisashon di e zona di yegada pa un eksperensia outéntiko di bon biní, i mihó indikashon di kaminda.
Un danki spesial ta bai pa Delfins Beach Resort pa a spònser e sala di reunion i Tourism After 5. Fresh Supplier tambe meresé un danki pa suministrashon di e mini bùrgernan durante nos Tourism After 5.
Pa mas informashon bo por manda un email na marketing@bonaireisland.com.
