Tourism Corporation Bonaire ta introdusí e promé “Marshe di Rincon” komo un eksperensia markante pa nos poblashon lokal i nos bishitantenan

Tourism Corporation Bonaire (TCB), den kolaborashon ku Surround Vibe, ta anunsiá e promé marshe mensual pa bishitante bou di e nòmber ‘Marshe di Rincon’, ku ta tuma lugá riba djadumingu 26 di febrüari 2023. 

Komo parti di e Plan di Rekuperashon di Turismo e marshe krusero na Rincon lo ofresé arte lokal, músika i kuminda, ku komo meta pa diversifiká e produkto turístiko, krea eksperensia nobo i ofresé nos bishitantenan un eksperensia outéntiko di e kultura lokal. 

‘Nos ta konbensí ku e evento akí ta bai bira un éksito grandi, i nos tin mester di bo sosten kompleto pa plama e notisia akí bou di bo koleganan, miembronan, empleadonan i bishitantenan. Nos ta spera di mira boso tur djadumingu próksimo na Rincon pa biba e eksperensia markante akí’, segun Miles Mercera, direktor di TCB. 

Meta di TCB komo parti di su plan di rekuperashon ta pa krea eksperensianan outéntiko memorabel pa tantu nos poblashon lokal komo nos bishitantenan krusero i bishitantenan ‘stay over’. A base di investigashon TCB a midi ku ta eksistí nesesidat pa un eksperensia di marshe den e bario mas bieu di Boneiru. Empresarionan lokal ta haña oportunidat pa kompartí nan sekretonan lokal i forma parti tambe di e benefisionan di e industria dinámiko akí.

TCB a presentá e evento karakterístiko akí durante e último Town Hall Meeting ku nan a organisá huntu ku stakeholdernan na nos isla i awor akí a anunsiá e tremendo produkto nobo akí. Ta enkurashá operadornan di tour i shofùrnan di taksi pa hinka ‘Marshe di Rincon’ den nan ruta komo un stòp durante nan rekorido riba nos isla. 

E marshe krusero ta tuma lugá riba djadumingu binidero for di 8.00 or te 16.00 or na skina di Kaya Rincon i Kaya Commerce.