Ku hopi plaser Tourism Corporation Bonaire (TCB)
ta kompartí resultado di e diferente esfuersonan di Relashonnan Públiko (PR) pa e
promé kuartal di aña 2024, den kolaborashon ku Boneiru su ofisina di PR, Diamond
Public Relations.
E plan di PR pa aña 2024 tin komo meta pa sigui oumentá Boneiru su fama na
Merka, Canada i e paisnan di abla aleman, manera Alemania, Oustria i Suisa (e
merkado GAS) i pa enfoká riba e trèntnan di biahe ku ta na kaminda, manera
biahamentu solitario, biahenan kulinario i biahenan di wellness. Banda di esaki e
esfuersonan di PR lo sigui pone énfasis riba e dedikashon ku nos isla tin pa
konservashon di naturalesa i pa nos kultura lokal, pa atraé bishitantenan ku ta
kompartí balornan similar i ku via medionan di komunikashon ke keda enbolbí ku
nos komunidat lokal pa enrikesé nan eksperensianan.
Durante e promé kuartal di e aña akí e diferente esfuersonan di PR a generá un
meskla di kobertura den medionan digital, medionan imprimí i medionan sosial, loke
a resultá den un alkanse grandi di 80,2 mion impreshon general den medionan di
komunikashon i 47 kolokashon meresí den medionan di komunikashon riba
merkadonan norteamerikano i 5,5 mion impreshon general den medionan di
komunikashon i 20 kolokashon meresí den medionan di komunikashon riba
merkadonan oropeo.
Bista general di e esfuersonan for di luna di yanüari te ku mart – Nortamérika
Durante e promé kuartal di e aña akí e tim di Boneiru a partisipá na e International
Media Marketplace, kaminda nan a topa ku 24 periodista pa sondea e interes ku tin
pa nos isla i kaminda nan a risibí dos bishita individual di e medionan di
komunikashon Tropix Traveler i Carolina Woman. Mas aleu nan a plania rekorido pa
prensa pa e di dos kuartal i nan a skirbi i distribuí komunikadonan di prensa tokante
“24 eksperensia nobo den 2024” i komunikashon di krísis. Nan a manehá
‘throwback-posts’ den medionan sosial di bishitanan anterior di medionan di
komunikashon i di ‘influencer’-nan i nan a sòru pa publikashonnan importante den
medionan di komunikashon pa medio di esfuersonan kontinuo di ‘pitching’.
Publikashonnan importante den medionan di komunikashon for di luna di
yanüari te ku mart – Nortamérika
E publikashonnan mas importante den medionan di komunikashon den e promé
kuartal ta entre otro un storia tokante Boneiru den The Toronto Sun, kaminda a tira
lus riba diferente partner na nos isla i riba eksperensianan kulinario, den Artful
Living, i den e edishon di wenter 2024 di e revista imprimí Travel Agent Central, den
National Geographic i den DriftTravel.com, kaminda a pone énfasis riba “24
eksperensia nobo den 2024”, den Grazia Magazine, den WhereverFamily.com, i den
Forbes.com, ku atenshon pa eksperensianan bou di laman, destinashonnan ku
enfoke riba famia i eskapenan den primavera ku enfoke riba adulto, i tambe den
CountryLiving.com i Recommend.com, ku atenshon pa destinashonnan pafó di e
rutanan di kustumber pa bishitá i opshonnan pa biahenan solitario pa Boneiru.
Bista general di e esfuersonan di luna di yanüari te ku mart – Oropa
Durante e promé kuartal di e aña akí e tim di Boneiru a partisipá na un kolaborashon
ku IAMTORO na Amsterdam riba Leidseplein pa un “Bonaire Take-over”, kaminda
a fiha atenshon riba diferente poster di nos isla i kaminda a sorprendé e ganadó di e
kampaña di Boneiru i IAMTORO. E tim a kordiná i risibí un bishita individual di e
ekipo di televishon di 24Kitchen, kaminda a tira lus riba e shèfkòknan lokal i e
tradishonnan kulinario di nos isla. Nan a plania rekoridonan pa prensa pa e di dos
kuartal i nan a skirbi i distribuí komunikadonan di prensa tokante “24 eksperensia
nobo pa 2024” i tokante komunikashon di krísis. Mas aleu tabatin enkuentro ku e
mihó ekiponan di televishon hulandes pa grabashonnan den futuro na Boneiru i pa
medio di ‘pitching’ a logra haña atenshon di prensa den publikashonnan importante.
Publikashonnan mas importante den medionan di komunikashon for di luna di
yanüari te ku mart – Oropa
Pa loke ta trata e publikashonnan mas importante den medionan di komunikashon
den e promé kuartal por menshoná entre otro e publikashon di 65 página Bonaire
Special in Reisbizz, kaminda ta tira lus riba hopi partner na nos isla i riba
empresanan nobo i un storia tokante Boneiru den TravelPro Magazine, Triptalk.nl,
Reisbizz.nl i TastyTrails.nl, kaminda ta dediká atenshon na “24 eksperensia nobo
den 2024”.
Na kaminda
Den e di dos kuartal di e aña akí e tim di Boneiru lo kordiná i risibí bishita individual
di medionan di komunikashon di USA Today, Authentic Chica, Nature Scanner,
Foodies Nederland i un freelancer, i tin un rekorido ku prensa ku komo tema ‘Bites &
Nights’, ku enfoke riba eksperensianan gastronómiko eksklusivo na nos isla i
eksperensianan despues ku solo baha.
TCB ke gradisí tur partner i stakeholder partisipante for di sektor privá pa nan sosten
i kolaborashon kontinuo na momentu di ‘mediahosting’ i pa nan ‘content’ pa e
esfuersonan kontinuo di ‘pitching’.
