Un seshon di profundisashon di mesa di klima a tuma lugá ku trahadónan di maneho di Entidat Públiko Boneiru i Rijksdienst Caribisch Nederland – RCN. E enkuentro ku Mesa di Klima Boneiru a organisá na Jong Bonaire tabata un paso importante den formulashon konhunto di un plan di klima ku sosten amplio pa Boneiru.
Traha huntu pa logra un Boneiru resiliente pa futuro
E mesanan di klima ta trese diferente grupo for di den komunidat huntu pa yuda pensa tokante e konsekuensianan di kambio di klima i tokante posibel solushonnan. Anteriormente ya kaba studiantenan, habitantenan di bario, organisashonnan sosial i empresarionan a bini na palabra. Nan ideanan i nan preokupashonnan huntu ku input di e trahadónan di maneho ta forma e komponentenan esensial pa e plan di klima.
Durante e seshon akí e empleadonan públiko a haña informashon tokante progreso di e proseso i e resultadonan preliminar. Banda di esaki nan por a kompartí nan propio konosementu, eksperensia i ideanan tokante kon kambio di klima ta impaktá nan terenonan di maneho, i kon nan mes por kontribuí na un Boneiru resiliente pa klima.
Partisipá bo tambe – yena e enkuesta!
E plan di klima solamente por ta fuerte i efektivo, si mas tantu habitante posibel laga skucha nan bos. Pa
e motibu akí a habri un enkuesta online pa tur habitante di Boneiru. Den e enkuesta akí bo por indiká kon kambio di klima ta afektá bo bida diario i kua ta e solushonnan ku bo ta haña importante.
⏳ E enkuesta ta disponibel durante un (1) siman mas.
👉 Yen’é awe mes via e siguiente lenk:
🔗 Enkuesta / Enquête / Survey