Bonaire

Tuma medida kontra Dengue, Chikungunya i Zika den temporada di awaseru


E temporada di áwaseru a kuminsá atrobe i e delaster simannan tin basta áwaseru a kai i esei ta nifiká ku e chèns pa haña e malesanan di Dengue, Chikungunya i Zika ta oumentá. Pa e motibu ei, Departamentu di Salubridat Públiko di Entidat Públiko Boneiru ta pidi tur habitante pa tuma medida pa evitá plamamentu di e malesanan akí.

Un tipo di sangura, Aedes aegypty, yamá tambe sangura di Dengue, ta transmití Dengue, Chikungunya i Zika. E sangura akí ta biba spesialmente den kas i kurá di hende. E sangura muhé ta pika hende pa e por chupa sanger ku e mester pa alimentá webunan den su kurpa. Despues e ta buska opheto ku awa aden pa pone su webunan. E sangura di Dengue tin preferensia fuerte pa opheto artifisial ku banda lizu i awa kla.

E manera mas efikas pa prevení Dengue, Chikungunya i Zika ta eliminá tur lugá kaminda sangura por pone webu. E sangura ta pone su webunan den awa ku ta keda para, manera baki di plèstik, tayer di outo, bòter, bleki i hèmber den kua awaseru ta keda para. P’esei Departamentu di Salubridat Públiko ta hasi un yamada na tur hende pa regularmente kontrolá i deshasí di tur opheto ku por tin awa aden, den i rònt di kas. Bo tin baki òf barí pa kohe awaseru pa mata òf bestia? Sera esaki bon pa sangura. Esaki por, por ehèmpel ku un paña òf ku un skrin ku ta mara ku un faha di elastik rònt di e parti habrí.

Ademas di eliminá lugá di pone webu, ta importante ku ta prevení ku e sangura di Dengue ta pika bo. Durante tempu di yobida, bisti paña ku ta tapa bo kurpa, usa un produkto fuerte ku ta kore ku sangura (manera DEET) i tene bo kas liber di sangura usando skrin i eventualmente flit paden. E sangura ku ta plama e malesanan akí ta aktivo durante dia i spesialmente mainta tempran i atardi. P’esei drumi durante dia bou di un muskitero.

Departamentu di Salubridat Públiko Boneiru ta informá ku na e momentu akí no tin señal ainda di sirkulashon di Dengue, Chikungunya òf Zika na Boneiru.

Bo mester di konseho òf yudansa ku tratamentu di renbak òf barí di awa? Tuma kontakto ku Sekshon Kontròl di Vèktòr di Departamentu di Salubridat via 715-5324.

Related posts

Konstrukshon di stashon di sensor Galileo akapará serka Rijksvastgoedbedrijf

EA News Author

Helicopter di Kustwacht a sali pa saca hoben di 18 aña cu a cai for di baranca

EA News Author

Ora pa ora tempo na Boneiro ta cera cu yobida

EA News Author

Leave a Comment