E publikashon di un investigashon nobo, ‘Mapping Caribbean Researchers’, ta revelá un komunidat vibrante pero poko konosí di investigadónan i profeshonalnan di konosementu ku tin relashon ku e seis islanan di e parti Karibense di Reino: esta Aruba, Bonèiru, Kòrsou, Sint Maarten, Saba i Sint Eustatius.
E investigashon, realisá pa investigadonan lokal Renske Pin i Steffen van Heijningen ku sosten finansiero di Ministerio di Asuntunan Interno i Relashonnan den Reino (BZK), ta mustra ku e region di bèrdat tin un tesoro di investigadonan i konosementu akadémiko. I ku e komunidat di konosementu no ta solamente riba e islanan mes, pero ku e ta ekstendé su mes ampliamente i aktivamente denter di e diáspora.
Kasi 400 investigadó a partisipá den e enkuesta ‘online’. E tema i kontenido di e kuestionario a keda definí den seshonnan di grupo di enfoke ku mas di 70 akadémikonan i profeshonalnan di konosementu lokal, kende huntu a determiná ki tema nan ta konsiderá esensial pa hasi e komunidat akadémiko Karibense mas visibel i mas fuerte.
E resultadonan ta indiká ku e mundu di investigashon Karibense ta grandi, diverso i altamente kalifiká. No ménos ku 38% di e partisipantenan tin un título di PhD, 13% ta aktualmente trahando riba nan investigashon di promoshon, i un otro 22% tin deseo pa kuminsá un trayekto di PhD. E komunidat ta konsistí no solamente di investigadónan den universidatnan i institutonan, sino tambe di investigadónan independiente, akadémikonan bishitante, i miembronan di diaspora Karibense ku ta sigui kontribuí aktivamente na e islanan.
E resultadonan ta revelá un komunidat ku un grado haltu di mobilidat geográfiko, multilingwismo i diversidat kultural. Investigadónan ta traha regularmente atraves di islanan i fronteranan, ta mantené lasonan estrecho ku Hulanda i ku e region Karibense, i ta hasi investigashon riba diferente tereno: desaroyo sosial, kultura, edukashon, salú, gobernashon i medio-ambiente. Hopi di nan trabou ta orientá na práktika i tin impakto sosial real.
Na mes momento, e estudio ta identifiká vários reto struktural ku ta limitá e kontinuidat i impakto di investigashon, manera akseso limitá na finansiamentu, dato, i sosten institushonal, kondishonnan di empleo i entrada insigur (nivelnan di entrada abou, di kua solamente 50% tin un plan di penshun), gastunan haltu di biahe i logístika, i bareranan pa konstruí kolaborashonnan sostenibel.
P’esei e investigadonan ta boga pa kreashon di un Portal di Investigadonan di Karibe—un plataforma digital ku ta mehorá e visibilidat i aksesibilidat di investigadonan i nan trabou, i ku lo fasilitá kolaborashon i fortalesé e ekosistema di konosementu di Karibe.
Pin i Van Heijningen ta profundamente agradesido na Ministerio di BZK pa e sosten finansiero pa e proyekto tan spesial aki, ku ta kontribuí mas aleu na e konosementu tokante i denter di Reino. Según e investigadornan, e tipo di konosementu aki no ta solamente importante pa e isla mes, sino tambe pa e kalidat di desishonnan di polítika den Reino. “Nos a haña un depósito inkreibel di ekspertisio—investigadonan altamente eduká, ku orientashon internashonal, profundamente ankrá den nan komunidatnan. Ku invershonnan modesto pero dirigí den kordinashon, finansiamentu i infrastruktura digital, e ekosistema aki por duna un kontribushon mas grandi ainda na desaroyo di polítika i konosementu denter di henter Reino,” e investigadonan ta duna di konosé.
E rapòrt ta konkluí ku ta esensial pa fortalesé infrastrukturanan di konosementu lokal i regional pa un futuro inklusivo i sostenibel. Lesa e resúmen i resultadonan na: www.tinyurl.com/ReportMappingCaribResearchers
