ORANJESTAD / ARUBA, 3 di januari 2026
Vuelonan di aerolinea Mericano pa y for di islanan ABC (Aruba, Bonaire y Curaçao) a wordo stop temporalmente. Trafico maritimo y e sector di crucero ta sigui funcionando normal.
E situacion entre Venezuela y Estados Unidos a sigui desaroyando den e ultimo simannan. Segun Prome Minister di Aruba, Mike Eman, ya tin medidanan di precaucion cu a wordo tuma, principalmente den e sector di aviacion.
Debi na e situacion actual na Venezuela, e espacio aereo riba Aruba, Bonaire y Curaçao a wordo cera na e momentonan aki specificamente pa vuelonan comercial di aerolinea Mericano. E decision aki a wordo tuma pa motibo di e incertidumbre rond di e desaroyonan entre Venezuela y Merca.
E stop temporal di e vuelonan aki ta pa un periodo indefini. Segun Prome Minister Eman, ainda no ta cla cu te ki ora e medidanan aki lo keda na vigor.
E medidanan ta tin consecuencianan directo pa Aruba. Vuelonan cu tabata plania pa sali di Aruba pa Estados Unidos no lo opera te otro aviso, y ainda no tin informacion riba ki momento esnan lo por wordo reanuda.
Vuelonan internacional y regional cu no ta opera pa aerolinea Mericano ta sigui nan itinerario normal. E trafico maritimo, inclui carga y crucero, ta sigui sin interupcion.
Prome Minister Eman a bisa cu comunidad di Aruba no mester preocupa. Segun Eman, no tin ningun menasa pa e siguridad local y bida diario na Aruba por sigui normal.
Gobierno lo sigui evaluando e situacion den e siguiente oranan y lo duna informacion actualisa ora cu tin nobo desaroyonan.