Den weekend di fin di november, Cas di Cultura a duna inicio na un capitulo nobo den e historia cultural di Aruba cu e lansamento oficial di su campaña publico pa recauda fondo, E Brasa, durante e prome anochi di e evento Cas di Pasco. Publico na e mercado di pasco festivo aki por a wak y scucha e estreno di e campaña su jingle- produci pa Steve Andreas y canta pa Freddy ‘Rasta’ Richardson, y video promocional, celebrando e vision di e centro cultural pa revitalisa su edificio historico y sigura e futuro di arte, presentacionnan y eventonan cultural riba e isla. E lansamento a wordo ricibi cu emocion di publico, artistanan y sostenedornan di comunidad, marcando un comienso inspirativo pa e campaña.
E campaña di E Brasa ta un iniciativa crucial cu e meta pa renoba y modernisa Cas di Cultura, garantisando cu e ta keda un espacio vibrante pa presentacionnan, exposicionnan, musica, baile y encuentronan di comunidad pa generacionnan benidero. Cu renobacionnan andando, e campaña ta invita publico pa participa pa medio di donacionnan di cualkier tamaño — cada contribucion ta hunga un parti den mantene arte y cultura di Aruba.
“Nos evento di Cas di Pasco tabata un momento realmente special pa Cas di Cultura y henter e comunidad,” Vicky Arens, Directora di Cas di Cultura a bisa. “E lansamento di E Brasa ta tocante mas cu renoba un edificio — e ta tocante conserva un espacio caminda historianan ta wordo comparti, artistanan ta crece, y nos herencia cultural ta haya bida. Nos ta yama tur hende bon bini pa join nos den e capitulo nobo y emocionante aki.”
E campaña a resalta durante e prome anochi di Cas di Pasco (28 di november), cu a conta cu musica festivo, bandanan popular di gaita, cuminda di pasco, y un vitrina di artesania local. E mercado di pasco a sigui dia 29 di november, ofreciendo un otro dia di celebracion festivo y compromiso cu comunidad.
Donacionnan na e campaña di E Brasa por wordo hasi online a traves di e website oficial di Cas di Cultura (www.casdicultura.aw), na oficina of personalmente na eventonan benidero. E campaña ta ofrece diferente opcion di donacion pa hacie facil pa tur hende contribui, asina por yuda forma e futuro di e teater.
E renobacion tin como meta pa mehora accesibilidad, mehora facilidadnan pa presentacionnan y exposicionnan, y provee un ambiente acogedor pa tur bishitante. E campaña ta enfatisa participacion di comunidad y ta celebra e esfuerso colectivo di clientenan, negoshinan, y amante di cultura cu ta reconoce e importancia di conserva e herencia artistico di Aruba.
Pa mas informacion tocante e campaña di E Brasa of pa hasi un donacion, bishita www.casdicultura.aw of manda un email na info@casdicultura.aw.
Tocante Cas di Cultura
Cas di Cultura ta e teatro nacional y centro cultural di Aruba, ofreciendo un plataforma pa musica, baile, teatro, exposicionnan, y eventonan comunitario. Desde su fundacion, el a hunga un rol central den alimenta talento local y conserva e herencia cultural di e isla. E teatro ta sigui ta un luga di encuentro pa habitantenan y bishitantenan experencia e rikesa di e comunidad artistico di Aruba.
